中環在線：
與譚詠麟李克勤家中夾band
霍建寧彈琴有一手
■譚詠麟自拍兩條片放上facebook，見到佢同霍大班興奮高歌。 
長和（001）大班霍建寧平日同佢老闆「超人」李嘉誠一唱一和，大家就見得多，霍建寧同譚詠麟、李克勤夾b
and唱歌，應該就好少見。譚詠麟近日將霍大班唱歌、彈琴嘅片段放上facebook，原來霍大班唔止精於財技，唱歌、彈琴都有一手。
■霍大班（左）彈琴伴奏，眾人樂在其中。 譚：慶祝佢嘅好日子
譚詠麟自拍兩條片放上facebook，見佢喺一個華麗大廳唱自己嘅《一生中最愛》，旁邊有一隊band，著住casual黑色衫、坐喺度彈琴嘅，竟然係年薪兩億元嘅霍大班，譚詠麟影住霍大班講咗句「一個音樂家為我哋伴奏」。
譚詠麟又喺條片度話，呢日去到一個好鍾意音樂嘅朋友屋企夾band，慶祝佢嘅好日子，不過就冇講清楚有乜喜慶事咁高興。跟住霍大班就拎住杯紅酒，好陶醉咁望住個螢光幕唱李克勤嘅《月半小夜曲》。老實講，霍大班彈琴就幾好，唱歌就一般喇。
其實好耐之前都聽過霍大班鍾意玩音樂，佢2008年曾經替中年女歌手區小麗（Irene A）創作歌曲，𠵱家上YouTube搵區小麗，搵到一首應該係霍大班嘅作品《送給你的歌》。
家中掛滿不同風格畫作
區小麗提過，佢當酒店酒廊歌手時，認識霍大班，之後拉埋霍太一齊夾band超過十年。佢指霍大班彈得一手好鋼琴，達到演奏級；霍大班家中有齊一個錄音室應有嘅樂器與器材㖭。根據譚詠麟條片，區小麗所言非虛。
呢段片除咗見識到霍大班對音樂嘅熱情，亦睇到佢幾咁鍾意藝術，譚詠麟圍住個廳拍攝，就見到呢個廳周圍掛住不同風格嘅畫作，可能同霍大班大千金霍尚欣熱愛藝術，本身係藝術收藏家，又經營網上藝廊有關，成個華麗大廳真係好似法國皇宮嘅一部份。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
