財經評論：
點解多謝Shell
■Shell冠名贊助「毛記電視第一屆十大勁曲金曲分獎典禮」，贏盡大家目光。 資料圖片
一個打正旗號大玩二次創作的「分獎典禮」，結果換來facebook一連三幾日洗版，如果閣下想讚《100毛》或者毛記電視成功搶盡焦點，小記不盡同意，其實今次「分獎典禮」真正搶到大家
目光嘅大贏家，是贊助商Shell。
小記不諳市場學理論，單靠觀察，Shell雖然係環球企業，多年來畀普通市民印象只是入油，佢覆蓋到嘅受眾，從來只係司機，覆蓋面講唔上好全面。
無懼打壓撐二創
之不過，多年來都只係贊助嚇汽車比賽呢類小眾活動嘅Shell，今鋪竟然夠膽冠名贊助「毛記電視第一屆十大勁曲金曲分獎典禮」，一間石油公司贊助一間初發展嘅網媒，贊助一班年青人搞一個全新嘅音樂頒獎典禮，講真，贊助費應該唔會係天文數字，但已經贏到唔少掌聲，搵埋盧海鵬二次創作《幾好相與》，用一隻歌軟銷曬公司嘅業務，完咗頒獎禮，Shell嘅品牌一夜間爆紅，更為年輕人所認知！
講得政治少少，喺二次創作仲有無得玩落去都成疑問嘅一刻，呢間石油公司無懼打壓出手撐毛記電視，可以講得上雪中送炭。難怪當晚在場司儀、嘉賓、得獎者都好激動向Shell講句多謝！佢哋講一句，已經等同幫Shell賣一次廣告。喺facebook駕駛群組，更加有班司機話即刻要去Shell打爆個油缸，明顯成功吸客！
諷刺的是，同樣是音樂頒獎典禮，更加是多年來號稱年輕人最喜愛的商台叱吒頒獎禮，唔講可能唔知，原來一樣有油公司加德士冠名贊助，但當晚大家最難忘嘅一刻，應該只係坤哥橫掃三獎，現場有人多謝過加德士咩？
加德士畀一嚿錢去贊助一個老字號、早已深入樂迷心嘅頒獎禮，贊助費隨時貴過Shell多多聲，呢一鋪，小記大膽估計，幫Shell做PR同Marketing嗰班高手，今年過年，你哋間公司好難有藉口唔分多少少花紅畀你哋囉！
記者：黃嘉銘
財經評論 舊文
來源 source: http://hk.apple.nextmedia.com
