財經評論 2016年2月18日

財經評論 2016年2月18日

財經評論：車主每月之苦


■政府停車場車位月租可謂平絕市區，每月都有不少人排隊買月票。　資料圖片

近排天氣乍暖還寒，間中還要落雨，出街返工固之然唔方便，連放假想出去行下都無曬興致。不過，最唔想天氣差嘅一群人，應該是一眾包括小記在內嘅車主。車主們唔係擔心落雨搞到架車唔乾淨，而係要淋住雨排隊買月租車位。

捱夜排隊租平車位
每個月23號，一個唔少車主都一定用螢光筆highlight起嘅日子，無錯，就係排隊月租政府多層停車場車位嘅日子。之但係，如果閣下一心打算23號嗰日早上先去買嘅話，諗都唔使諗。

就以小記長期租用嘅街市上蓋之政府停車場為例，月租1,700元，提供約230個私家車、客貨車月租泊位，有蓋車場計，基本上平絕市區。在每個月22號嘅下午，已經有老人家擔定凳仔到售票處外排隊，瘋狂程度不下於排隊買演唱會門票。通常當晚收咗工，11點左右開始排，已經排到最少第40至50名，如果撞正該月23號為星期六、日或公眾假期，多人唔使返工嘅日子，人龍會提早加長，天都未光，就已經百幾人排隊排到出曬街，當日出售月票亦更快沽清。

好彩，唔少車主都會採用車輪戰，即係一家人輪流「當值」，阿媽排一陣，阿哥家姐細佬輪住排一陣，務必守住個排隊位，輪流上番屋企休息，呢個moment，相信好多敗家仔，都會唱番句「世上只有媽媽好」。

講到尾，私家車係奢侈品，其實喺香港呢個人煙稠密嘅地方，可能唔少人都覺得，市民好應該用多少少集體運輸工具，之不過，當閣下見到只有半個多少少香港咁大嘅新加坡，車主們都從未擔心過無位泊車時，就可以解釋到香港政府在土地規劃做得何其「出色」。

記者：黃嘉銘

財經評論 舊文

來源 source: http://hk.apple.nextmedia.com