金手指：問心無愧的08年
■《沽注一擲》內的角色Michael Burry是名對沖基金經理，常以T恤短褲見人。 資料圖片
對上周末去咗睇《沽注一擲》。大家睇呢齣講幾個當年買花旗國樓市爆嘅人，對於孫柏文來講，彷如自己嘅經歷。每個睇樓市爆煲嘅角色，都有特質我有份。
Mark Baum憤世嫉
俗，覺得金融界充斥著邪惡，沽爆賣跌除想贏錢外，更想教訓佢哋。摷番我06、07、08年啲文，我同佢冇分別。Brownfield嗰兩個𡃁仔，後生，對行內規矩近乎無知，俾啲行內人恥笑、唾棄。當年喺本欄隔離，有個已離開《蘋果》嘅前輩，點名批評我同包括我喺06年中寫，題為《美樓市將會慘過八萬五》嘅文。佢篇文條題？《「自瀆」文章弄巧反拙》。
盡傳媒人責任說實話
Michael Burry是對沖基金經理，T恤、短褲。同我當年唯一分別，就係佢赤腳，我著人字拖。
嗰晚睇完，朋友輕鬆傾計咁話：「講到嗰兩個𡃁仔搵喺《華爾街日報》做記者嗰幕，點知個記者一句話唔會為呢單嘢喪失多年建立嘅金融界網絡所以唔報道。你哋傳媒界嗰轉都算幾失職。」
唔知點解，我聽完就激動答：「外國傳媒我唔知。香港有我當年喺《蘋果》嘅文喺到警告，甚至諗埋香港散戶點樣可以一齊買佢爆！你知唔知當年我叫人一注獨沽滙控（005），批評有幾勁？你睇番有線喺07年8月1日嗰集《Money Cafe》。我因企硬叫人沽清滙控，俾人藤條炆豬肉！青姐嗰日真係好大力、啪一聲打落來！電影裏面都未有人因睇淡俾人打！我有囉！」嗰浪，作為財演，問心無愧。
不過令我最百感交集嗰幕，就係當嗰兩個𡃁仔成功開倉買跌後興奮時，被幫佢嘅已退休老行專鬧：「你哋咁開心做咩？知唔知如果你哋啱，好多無辜嘅人會死？」呢刻，我對大陸成個秩序嘅感覺有如喺07年。你可能好想見共產黨倒台，不過你知唔知會有幾多無辜嘅人死？
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
