中環在線：靚女見習騎師助拉頭馬
陳南祿馬運轉佳
■「快寶駒」跑出，陳南祿（右）終於可拉頭馬。
恒隆地產（101）董事總經理陳南祿（Philip）一向冇乜馬運，佢養過幾隻馬，唔係跑唔鬱，就係跑包尾。噚日佢以馬會董事身份，負責沙田賽馬監場，忽然有運行，佢與一眾好友合夥嘅團體馬「快寶駒」
，第三場賽事一開閘就彈出，最後直放到終點。
■見習騎師蔣嘉琦 資料圖片 周松崗馬評人上身
開跑前，華華喺馬會遇到同為馬會董事嘅周松崗，佢話，由於第三場Philip有馬出賽，所以佢要幫手頂替做一場監場。周松崗都唔怕得罪老友，直指Philip嘅馬運麻麻，不過，今場佢隻馬「快寶駒」由靚女見習騎師蔣嘉琦策騎，有輕磅優勢，大家可以留意下咁話。
賽後周松崗好似馬評人上身，滔滔不絕咁講，指隻馬輕磅，所以開閘就帶出；更難得嘅係，佢有能力壓住頂級騎師潘頓力迫，帶到終點，為Philip一班馬主贏得40多萬獎金。
但可能「快寶駒」一班馬主，包括李家祥、廖長江、葉錫安等人，都冇諗過隻馬跑出，噚日唔見佢哋，Philip亦冇叫埋親戚朋友去捧場，所以影拉頭馬相時，感覺比較人丁單薄。
講完馬，就同身兼港交所（388）主席嘅周松崗講經濟，對於評級機構穆迪日前降低本港前景評級展望，周松崗認為，此舉跟中國因素未必有太大關係，之但係，中國因素確係今年賽馬與六合彩投注額減少嘅原因之一，事關內地人投注真係少咗。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
