笑到最後 - 高明 2016年3月14日
笑到最後：移民將是最佳投資
香港係移民城市，可幸嘅係對上的三、四十年，香港建立起「本土」文化，股樓都行大運，本來有落地生根嘅條件。可惜最近幾件事睇得出，新管治者唔等「五十年不變」，已經下緊「逐主令」。身為一個投資者，有命、有支配財富嘅自由，先係最緊要，移民攞本外國護照保命似乎係惟一出路。
高鐵超支係一個轉捩點。高鐵超支，係打香港人荷包救國。但香港嘅用途，從來都唔係以榨乾香港為目的，香港唔識生金蛋，但識得擔水，然後救濟大陸。最早識得利用香港嘅係滿清嘅胡雪巖，透過香港外資財團，為滿清政府借錢打仗。近年就有紅籌、H股上市，集資嘅錢，有一部份可能係香港散戶的，但真正來源係外資，中國想要嘅，唔單止係外國嘅錢，仲想借外國個名，挾洋自重，返去同鄉里講嘢都大聲啲。
香港嘅用途就係咁，用嚟對沖大陸嘅不幸，因為體制同大陸唔同，方便同洋人行事，唔需要成個國家改變體制去遷就一單刁，制度嘅嘢由香港解決，大陸直接拎錢就算。高鐵蝕本都要做，原因好明顯係「心知肚明」，但夾硬淘空香港庫房，就知道當今管治者，唔打算當香港係一個方便嘅融資渠道，而係想殺雞取卵就算，然後將香港變成中國其中一個城市。
香港被人陰嚇又陰嚇，固然好快會衰落。制度建立要用幾十甚至過百年，破壞就可以好快，聽日即使覺得香港原來咁有用，都未必一下子還原得到。另一邊就反映，大陸嗰邊真係好等錢使，寧願破壞香港來之不易嘅和諧，都要渾呢百幾億水，背後經濟危機先令人心寒。
A股股災後，中國鎖國多過開放，殺埋香港等於中國拒絕再向國際學習。近代中國從抄襲學習西方制度起家，到今日自覺有成，停止學習。即使香港變成中國的一個城市，背靠嘅「祖國」選擇停滯不前，香港都唔會有運行。再加上，近年中國掀起仇視香港情緒，一旦香港變成中國其中一個城市，中國人可以自出自入，香港人未必安全。
所以，身為一個投資人，最大投資就係投資喺自己身上，香港回歸移民城市命運，拎本護照傍身在所難免，即使買中下一隻騰訊（700），都要有命享先得。真正香港仔性格係：繼續喺香港搵食，床下底有本護照。可能香港股樓會再升，但有起事上嚟，走得到保命最緊要。
高明
https://www.facebook.com/bigricetea
本欄逢周一刊出
高明
笑到最後 - 高明 舊文
來源 source: http://hk.apple.nextmedia.com
