智取大市：股票贏家條件（二）
■炒股票要贏便要將謙虛、勤力、高要求、冷靜變成習慣。 資料圖片
股票贏家不多，天生就懂得喺股市贏錢嘅，更加少之又少；呢個世界亦冇人一生都不停贏，任何人喺投資路上，都需要不停學習。以小弟見過嘅股票贏家，個性通常係點？
謙虛，越謙虛者越強。即使為人本身不謙虛
，提起股票、問number嘅時候都會謙虛，因為佢哋明白，一個人睇唔曬咁多number；有朋友，就有人幫自己趨吉避凶，贏家即使面對一個買股票通常輸錢嘅朋友，都會細心咀嚼對方正確嘅想法，從來唔會因為炒股而用言語去攻擊朋友。
一定不能少嘅係勤力，做功課做得比其他人多。認識唔止一位股票專欄作家，每個交易日會將千幾隻港股圖表全部睇一次，事實上幾盡嘅方法都有人會做，肯做就可能係贏家。
對自己要求高，身邊有短炒贏家，以每日捉到最強板塊為目標，捉唔到就唔合格，與此同時，輸錢不會賴地硬，只會自認技不如人。
EQ高，即使輸錢影響情緒，但對住報價機就會冷靜起來，因為，同股票博鬥，只要有幾日失去理性，足以影響一生。綜合上述，要贏便要將謙虛、勤力、高要求、冷靜變成習慣。
上述條件聽起上嚟好似好難，但講到尾係要有決心，有決心去令自己變成贏家為止。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com
