中環在線：內地視頻網用戶增50%
愛奇藝播《太陽》 狂吸金兩億
■宋仲基（前排左）同宋慧喬主演嘅《太陽的後裔》，幫視頻網大賺。 《太陽》劇照
闊別「公仔箱」差唔多三年的「喬妹」宋慧喬，聯同新一代男神宋仲基，合拍的韓劇《太陽的後裔》近期熱爆中港台，華華身邊唔少港女朋友已經中曬毒。今時
今日嘅觀眾，逐漸習慣用平板電腦同手機「煲劇」，所以一台獨大嘅TVB（511）舊年就錄得上市27年來首次持續經營業務虧損；但內地的視頻網站，就撲中《太陽》，齋計會員收費都勁賺近兩億！
到底神劇《太陽的後裔》吸金力有幾「神」？韓聯社做咗一個統計，內地主要視頻網站「愛奇藝」，早前購入《太陽》內地獨家播放版權，劇集開始播放後，據講其收費會員人數激增50%，達1,500萬戶；以月費19.8元人民幣、煲曬一套《太陽》至少要訂兩個月咁計，即單計會員費收入，愛奇藝就勁收1.9億元人仔（即約2.27億港元）！而愛奇藝買呢套劇，每集成本只係23萬美元（約179.4萬港元），全套劇集16集計總成本為2,870萬港元。換言之，一套韓劇就幫愛奇藝賺咗差唔多兩個億。
Viu成下載榜首位
神劇收得，香港都唔執輸。電訊盈科（008）旗下的OTT網絡電視應用程式（App）Viu，都免費畀香港觀眾睇《太陽》，雖然電盈無公佈用戶人數，但呢個App最近喺蘋果App Store同Google Play都係下載榜首位。既然係免費，相信Viu好難好似愛奇藝咁，將《太陽》嘅魔力直接化為收入，但Viu「打頭炮」即吸引到不少港人下載，仲有廣告㖭，相信都係唔錯嘅投資。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
