位高勢危
2016/03/29 08:05:48
網誌分類: 經濟
復活節假後復市，歐洲股市唔得，德國股市跌1.7%。美股「靜蠅蠅」，全日變動不大，杜指收市微升20點，收報17535點；標普500指數微升1點，收報2037點；納指則微跌7點至4767點。
美股無大變動，主要係市場等待聯儲局
主席耶倫今日的發言，睇睇會唔會搵到聯儲局加息線索。另外，今年第一季度將於週四完結，即將踏入美企業績公佈周，週五將公佈並國就業數據及以及ISM製造業數據，亦令到投資者轉趨謹慎。
美股呢幾日都在窄幅橫行，無大上落，對大市未來走勢係一個好消息，因為可以消耗一下超買壓力。不過，有紐約分析員指出，美股目前好投資氣氛，整體上出現一些危危地的感覺，可以從幾個方面睇得到。
第一係美股股值其實唔便宜，目前的估計，標普500成份股的平均PE係17倍，高過長期的平均值。
第二，美企盈利下行風險比較大，據金融調研公司FactSet目前的估計，美企第一季度盈利較對上一季下跌8.7%，係2009年以來最大跌幅，而且係連續第四季下跌，營收更係連跌5季。另外，市場預期要到今年第三季，美企盈利至會回復增長。
第三，美國經濟增長預期亦比較弱，CNBC的Rapid update目前估計美國今年首季GDP增長只有0.9%，遠差過市場預計的1.4%！
在這個經濟發展及企業盈利前景相對暗淡的氣氛下，無怪乎市場打雀咁眼，睇住耶倫及幾名聯儲局公開市場委員會重磅官員今個星期的講話。交易員指出，唔少交易員相信仍然希望今年春季內加息，如果真的加息，美元勢必再度轉強，那些對美元匯價比較敏感的能源、原材料及工業股將會受壓，勢將進一步令到美企盈利及美國經濟造成衝擊。
現時，美股經過近一周的整固，現時正處於一個轉化的時刻，問題係那些利好市場的催化劑，例如弱美元、聯儲局的「鴿派」態度及好過預期的經濟消息，現時已開始無幾個星期之前咁好啦。
我覺得油價係其中一個能否支撐大市的關鍵，美股由2月中見底反彈，好大原因係油價見底回升，其中原因係市場憧憬幾個主要產油國能夠在連番會議中達成凍產，甚至減產協議。長島原油供暖研究所首席執行官魯尼昨日指出，雖然之前主要產油國達成一個將產量凍結在1月水準的四國協議，但1月的產量都已經是多年最高水準了，所以不能幫助全球原油市場供求達到平衡。
油價今年上半年能企穩於每桶40美元的機會唔係好大，紐約原油期貨昨日回落至40美元下方，收39.37美元，主要原因係係全球最大產油國沙特唔願意油價企於40美元上方，首先係40美元係美國頁岩氣商能唔能夠繼續生存的生死線，沙特當然唔想美國頁岩氣商翻生。
不過，比起美國頁岩氣商的死活，沙特似乎更加關心她的兩大政敵俄羅斯及伊朗，是否能夠透過原油賺到資金，如果油價夠高，俄羅斯、伊朗都賺到錢，將對沙特的社會穩定造成威脅。沙特王室要想唔保住統治權，唯一的方法就是確保油價低迷。
俄羅斯介入烏克蘭衝突，油價便開始下跌的，我覺得唔係巧合。你睇沙特去年出現了900億美元的財政赤字，而分析估計，油價要升上80美元，沙特財政預算才能夠平衡，然而沙特仍然唔肯減產，可見政治遠比經濟重要。分析界目前估計沙特的油價財政生存線處於20美元到30美元之間，而沙特對今年油價的官方預期是每桶29美元，顯然亦唔係巧合。中東局勢未解結，油價仍有下行風險，不可不防。
陸羽仁
回應(2) 我想回應
陸羽仁 BLOG 舊文
來源 source: http://blogcity.me
