金手指：
輸老婆本要投降
■人民幣貶值威脅太大，摩比亦受影響。圖為集團主席胡翔。 資料圖片
今日入正題前，孫柏文上周話特朗普因會顛覆現有呢個有錢人更富，窮人更窮嘅貨幣政策，所以喺花旗國咁受歡迎。有批fans問：「耶倫其實係伯南克嘅DNA，央行行長都係咁㗎啦。特朗普有人選咩？」其實，特
朗普有答過佢想搵邊種人。佢偶像就係格林斯潘之前嘅聯儲局局長沃爾克。
沃爾克係個1980年就算破記錄失業率下，因見貨幣政策失控，加息加到廿厘嘅行長。當佢被問到1980年後對人類最有貢獻嘅金融新突破係乜時，答：「自動櫃員機。」佢覺得啲新財技都係為風險放煙幕，最終危害銀行系統嘅掩眼法。所以貨幣政策上特朗普係眾人皆醉佢獨醒。
入正題，有兩間我曾建議「不問價追」嘅公司出業績，主做大陸電訊商鐵塔天線嘅摩比（947）同埋香港電視（1137）。
我對大陸4G充滿信心，用嘅人數、每人用嘅數據量會不斷上升。落到呢個價，摩比論業績或資產負債，用人民幣計呢刻都好抵。不過，最重要係人民幣唔再貶值。之前我諗住4G增長應能抵銷人民幣下跌嘅風險，不過睇業績，畀我感覺係大陸啲電訊商做採購時，因冇咗以前飲茶灌水，令採購速度大幅下降，而人民幣貶值嘅威脅實在太大。今日我要正式投降，取消「不問價追摩比」嘅建議。第一次建議日前收市1.83元，話目標3蚊，最後最高見2.59元，上周收1.03元。我話過啲老婆本都買咗落去，現唯有押後婚事了。
最後，市值14億嘅香港電視出業績話蝕8億幾，睇落去好驚人。不過，呢間近乎冇業務嘅公司，係唔應該睇業績，而係睇資產負債表。雖然佢淨資產都係跌8億，不過6億係撇清已使咗錢嘅劇集同埋啲無形資產，燒錢速度完全受控。而因撇曬所有嘢，佢淨現金都有14億，佢仲有個一搵到錢嘅電視經營模式就隨時行得嘅系統在位，我深信大家都要繼續不問價追定睇王維基點做。
孫柏文
獨立股評人
http://facebook.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
