Money Walker：
今日小店明日香港
■舖租昂貴迫死小店，亦妨礙創業。 資料圖片
近月小店因貴租被迫死嘅新聞不絕，香港地少人多，舖租屋租難免易升難跌。
屋租越高樓價自然越高，樓價越高地價當然越高，地價越高對政府庫房越有利，所以除非樓價升速有機會釀成金融風險，
否則政府會放任市場，不插手幹預高租金同高樓價嘅現象，問題係政府嘅短視只會令香港落後於人。
英國城市政策研究機構Centre for Cities幾年前一項研究發現，高租金唔止影響市民生活，仲會削弱一個城市嘅競爭力。Centre for Cities指經濟增長、技術水平、創新能力等方面較強嘅城市，如果出現房屋供應短缺同高樓價情況，或會煞停經濟。
原因不外乎係高租金導致營商成本上升、難以吸引外來人才等，而市民因為要留番筆錢交租而減少其他方面消費，亦不利整體經濟增長。對於呢類城市，要提升競爭力，政府應該做嘅係解決房屋供應短缺問題。
雖然Centre for Cities嘅研究係針對住宅租金，而非店舖租金，但兩者道理其實相近。舖租貴迫死小店亦妨礙創業，店舖亦須為應付貴租而縮減其他方面開支，當中包括夥記人工。上述種種最終都不利本港競爭力同整體消費市道。
可惜政府永遠認為起基建先係提升競爭力嘅王道，撇除政治原因不談，筆者想知政府高官們到底具備幾多經濟學知識。
高中經濟科有教乜嘢係尋租活動，尋租活動大意係指擁有某項資源嘅人可以利用有關資源，喺冇從事任何生產活動嘅情況下享有利潤，而業主出租所持物業，就係尋租活動嘅一種。
經濟學認為，社會上嘅尋租市場越大，整體經濟效益就越低。作為政府，雖然唔可以阻止尋租活動，但就可以透過某啲措施減少尋租活動，例如係增加住宅供應、增發小販牌等。但都係嗰句，除非涉及金融風險，否則香港政府唔會認為高租金高樓價有咩問題。
有句說話叫「if you can"t beat them, join them」，大概香港人深明呢個道理，所以唔少人嘅人生目標係買幾層樓，一層自住，其餘收租，印印腳過下半世，但現實中要加入業主行列亦唔容易。而喺beat同join之間，我哋能夠做嘅只有繼續哀悼小店落閘與香港衰落。
El.
本欄逢周二、五刊出
El.
Money Walker - El. 舊文
來源 source: http://hk.apple.nextmedia.com
