老外堅睇淡
2016年03月16日
大市升上兩萬點後有阻力，加上油價回軟，就算人行進行逆回購，港股仍然乏力。恒指收報20288點，下跌146點；國指收報8605點，下滑80點，成交得565億元。
摩根士丹利發表報告指，全球經濟衰退風險增加，估計歐洲央行
會再減息，而佢喺亞洲及新興市場股票策略報告春季展望，仲調低區內多個指數目標。喺新估計下，大摩將恒指十二個月目標由23632點降至20500點；國指基本目標由9700點削至8250點。惟恒指最熊目標則大削14.6%，由16500點調低至14080點，國指最熊目標由7300點劈至5650點，降幅高達22.6%。
大摩勁劈恒指目標，港股昨日反應唔大，有中環茶友話阿爺家全力頂住，甚至不惜拉閘放狗，最近人民幣離岸價不跌反升，有說係賭沽空的淡友投降平倉，似乎老外狙擊阿爺，暫時無乜甜頭喎！
舜宇質高價錢貴
茶友呢個講法短期可能係啱，所以唔排除個市仲繼續彈吓，但睇長啲都要要講番基本因素，如果內地經濟唔好番，可能彈完都係要跌，大摩嘅睇法係比較偏重實體經濟同中線分析，同短線個市表現未必完全一致，但就反映外資對中國以至全球狀況仲係好唔放心，由於無新錢落行，所以點解個市成交咁奀。
全球經濟就算唔係倒退，都已進入慢波行車階段，呢個時候企業要能有突出表現，已經唔可以靠放水或資產升值嘅大潮流帶動，而係要靠本身有核心競爭力，不過發掘呢類公司唔易，有都唔會好平。
最近幾隻公佈業績的工業股獲大行推介。做可分拆平板電腦的巨騰(3336) 去年純利升14.4%至8.75億元，下半年純利達5.21億元，比上半年大增47%，匯豐證券就覺得好過該行預期。該行估計巨騰現價折合唔夠6倍預測市盈率，數字上大件夾抵食，關鍵係大家點睇可分拆平板電腦需求，係咪可以喺平板電腦被手機不斷侵蝕下逆流而上。
如果要講增長，做鏡頭嘅舜宇光學(2382) 就備受看好，同時股價就唔平。佢公佈去年純利升35%，達7.36億元人民幣。大行野村讚佢表現優於該行預期的3%，由於產品毛利率大幅改善，反映集團正由低端產品轉型至高端光學產品。
舜宇去年業績咁標青，主要係光學與汽車鏡頭出貨量分別大升1.52倍及47%，手機鏡頭模組出貨量升22%，市場今年關注分別有雙鏡頭手機、汽車鏡頭及手機鏡頭業務帶來的機遇。
喺對上一個財政年度，舜宇主席喺報告已經引述研究報告，話對主動安全系統和智能駕駛的趨勢非常看好，高級輔助駕駛系統(「ADAS」)成長日益迅猛。因此，新車所配備的攝像頭個數將不斷增加和複雜化。
集團是全球為數不多能提供高質量及多規格車載鏡頭的廠商之一，市場份額已經處於全球第一且逐年遞增，發展勢頭不容小覷。從最新業績顯示，公司的估計無錯兼食正呢個大浪。
尋寶要向平股搵
資訊科技發展一個特色，就係鏡頭處處，舜宇由上市以來以來評價都唔錯，由於手機出機量漸趨飽和，令人擔心佢增長會放緩。呢兩年公司提出提出「做深做精現有優勢業務」與「加速轉型升級」的策略，大力開拓汽車產品，家開始有回報。過去幾個月大市雖然回落，但不少大行仍然睇好公司業績，故此股價保持堅挺，買佢除咗眼光都有啲膽博膽。昨日佢再升5%，報收19.32元，已經去到近年高位，市盈率接近23倍，逐步逼近幾間大行目標價。以擁有產業優勢、有條件成為基金股計，呢個市盈率嚟唔可以話貴，只係累積升幅咁大，高追隨時要準備捱價。
如果唔想買大價貨，市場仲有其他工業股可以留意，好似炒緊復蘇嘅飛達帽業(1100) 同一啲波鞋股，佢哋級數當然唔同LEVEL，不過想尋寶不妨自己留意吓。
陸羽仁
金融High Tea 舊文
來源 source: http://hdfin.stheadline.com
