智取大市 - 晉佳 2016年4月12日
智取大市：
美滙弱港股有得彈
■港交所股價最近已出現四連陽。 資料圖片
連續兩日恒指漠視美股波動，先跌後升，係強勢就冇得拗頸。日圓滙價爆升嘅同時，美滙指數亦開始轉弱，令人民幣貶值壓力減少，短線對於港股有幫助，呢個似乎係近日港股回勇嘅催化劑。噚日起，美滙指數同港股走勢呈反向，足以確認呢一點。
呢一刻投資者未見興奮，成交又少，似乎投資者未盡消化好消息，未嘗不是好事，短炒機會又嚟，可暫時放低基本因素埋一邊。成交少，只能造就個別板塊輪流炒，噚日科網、鋼鐵、水泥、煤炭股起動，斷估今日要轉一轉主角。睇圖的話，醞釀圓底兼成交逐漸增加，就係爆上徵兆。
睇圖似醞釀圓底股份，就有搞重組嘅航運股中海發展（1138）同中國遠洋（1919），之前航運股公佈重組方案之中，呢兩間公司喺方案之中偏向較著數，中海集運（2866）就較為不利，詳情喺早幾個月本欄講過。事實上，呢項因素似乎逐漸反映喺股價之上，中海發展、中國遠洋走勢偏強，配合圖表靚仔，短線可以一博。
如果覺得捕捉板塊難，買向來短線較易操作嘅港交所（388），應該冇死錯人，港股由調整逐漸變為轉強期間，港交所最近已出現四連陽，2月中以來一直守得穩保歷加通道中軸，只要市況回穩，之後表現唔會差。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com
