鳳凰無寶不落
2016年04月12日
港股昨日開市軟軟哋，喺內地股市慢慢修復失地下，終於回升收市。內地股市跌穿咗上證綜指三千點關口後，開始見到有啲支持，個別大行好似匯豐撐A股，認為遲啲深港通啟動之後，A股前景都係會睇番好啲，加上公佈的通脹數字
對辦，上證指數勁彈1.7%收市。
A股有力回升，恒生指數低開115點報後跟番A股造好，最多曾升180點，高見20550點，午後走勢雖然偏悶，最終仍能重上20400點收市。恒指全日收報20440點，升70點；國企指數全日收報8807點，升102點，成交583億元。藍籌股大致造好，但東亞(023) 股價逆市下跌2.3%，報27.35元，為跌幅最大藍籌股。
東亞李家好頭痕
東亞銀行在股東大會後被插，主要就係主席李國寶連任的議案只能低票通過。東亞主要股東？家除咗李氏家族之外，就係中銀同埋西班牙銀行，由於西班牙銀行有可能賣股，令股東間關係唔太穩定。
東亞主要股東除咗兩大銀行集團，仲有就係南洋郭令燦家族控制的國浩集團(053) ，過去幾年國浩不斷傳出有意挑戰李氏家族喺東亞嘅管治。？間銀行受經濟拖累，生意難做，東亞內有郭氏、外有維權股東施壓，有被人內外夾擊之勢，就算李國寶行走江湖經驗豐富，都唔係咁易應付。東亞股價早前炒高，暫時狙擊不成都要回一回氣。
華潤醫療變身成為鳳凰醫療(1515) 大股東，鳳凰醫療復牌後，股價爆升19.8%。今次交易有少少反向收購的味道。根據建議，鳳凰醫療會以37.22億元，向無上市的華潤醫療集團收購其子公司Ample Mighty Limited，代購將按每股8.04元向華潤醫療發行4.63億股支付，相當於擴大已發行股本不少於35.7%，比停牌前折讓11.65%，透過換股華潤醫療變身成為鳳凰醫療大股東。
今次華潤注入的子公司有47家醫療機構，包括4家三級醫院、6家二級醫院、25家一級醫院及12家社區服務中心，及3家養老機構組成，分別提供牀位過萬張，於2015年年度總醫療收入規模達到約24.1億元人民幣。
市埸對於華潤成為鳳凰大股東，似乎相當受落。德銀發表報告，估計收購作價約17倍市盈率。該行仲估，華潤醫療向鳳凰醫療注入資產後，可為鳳凰醫療創造長線價值，透過放大華潤醫療的國企地位，同時相信會短期會透過公私營方式進行更多收購。仲有嘅係，華潤未完全注入所有醫療資產，未來可以逐步泵大佢。
德銀預期，鳳凰醫療今年EBITDA可達4.07億元人民幣，明年可升至4.9億元人民幣，維持該股「買入」評級，目標價由11.5元升至13元。該股全日收報10.9元，升近20%。
炒華潤注資泵大
今次被華潤睇中的鳳凰，幾年前上市後加快擴張，去年與香港UMP聯合醫務保健集團在股權及業務層面展開深入合作。兩者會參考香港成熟的診所配置結構及產業化模式，結合本集團現有醫療機構資源，於北京市建立盈利性全科診所網絡通過全科初級醫療服務網絡的普及和分級診療體系的建立，為患者提供健康管理服務，將來仲會探索醫療保險、康復護理、養老服務等產業鏈上下游業務業務機會。
華潤一貫採取綜合企業的發展方式，傳統零售業較強，其後陸續拓展飲料、能源、水泥、地產等生意，反映集體因應產業變化投資，呢個策略過去都幾成功。醫療喺內地人口逐步老齡化下，被視為有潛力的新產業。華潤都有意加大投入。現在集團取得鳳凰醫療三成幾股權，相信會透過注資增持。由華創借殼開始，佢哋對反向收購積累唔少經驗。通常呢類玩法會用慢火煎魚的手法炮製，如果睇好呢個板塊，可以分段儲貨上車。
陸羽仁
金融High Tea 舊文
來源 source: http://hdfin.stheadline.com
