日元套利拆倉
2016/04/12 08:28:18
網誌分類: 經濟
美企業績公布潮前夕，投資者態度謹慎，美股先升後回，不過幅度唔大，杜指微跌21點收場。
美國鋁業於昨日收市後公布季度業績，掀開美企業績公布潮序幕。 美鋁首季盈利每股7美仙，好過市場預期的2美仙，但營收就唔得，只有49.5
億美元，差過預期的51.4億美元。
美鋁宣布第一季已裁員600人，預期今年會再裁減400人。昨日收市升4%，但業績公布後跌番4.3%，全日倒跌0.5%。隨著商品市場走弱，美鋁過去12個月，股價累跌達25%。
日元兌美元昨日升至107.91日元的17個月高位，為日本和美國的股市投資者都敲響警號。本來，日元貴，美元平，影響日本出口和日股投資情緒都好易理解，但對美國出口本來有利，但原來講到股市投資情緒，又係另一回事，由於日元向來都係一種避險資產，唔睇好股市的時候會買入避險，風險胃納高時又會沽出日元，轉買股票。日元係咁升，本身已部分地反映市場避險氣氛不斷升溫。
另外，對好多交易員而言，日元可以講係一種「融資貨幣」（funding currency），由於日元利息特別低，好多人都會借日元沽出換美金買其他回報較高的資產，美股當然係其中的主要投資產品，作套利交易，希望匯價和股價兩頭賺。但日元不斷升值，首先蝕沽空日元的?價，就會令到做呢種交易的基金由「借日元買股票」變成買番日元平倉，雖然目前仲未大規模出現的呢種套利交易拆倉狀況，但在投資者心理上已經造成壓力。
油價繼續係市場的關注點，自從年頭傳出石油出口國組織（OPEC）將會與非石油出口國組織展開石油凍產會議以來，市場憧憬油產唔會繼續無底深跌，紐約油價由2月初最低約每桶26美元，反彈上上周的40美元上方，之後在附近徘徊。今個星期日，大約有15個來OPEC及非OPEC的主要產油國將齊集卡塔爾首都多哈開會。
紐約5月期油價格昨日一度升穿40美元，但後來大幅回吐，收市倒跌20美仙至每桶37.52美元，反映投資者覺得多哈會議對改善油價效果沒有信心。高盛昨日就認為會議唔會為油價帶來「牛勢」，表示仍會維持年底每桶35美元的目標價。高盛認為會議達成有意義的協議的最大障礙將會係沙特及伊朗的敵視關係。
上周，路透社引述沙特王子Mohammed bin Salman話沙特會限制生產，如果伊朗會這樣做的話，但經過多年的經濟制裁，現正著眼於復興經濟的伊朗已經表明，未確定會否參加即將舉行的多哈會議，即使參加，都唔會提及凍產的問題。高盛指伊朗的原油生產量已經超過市場的預期，估計沙特下個月亦會報復性提高石油產量，進一步顯證明原油市場的平衡難以維持。
事實上，對多哈會議能夠有成果，基本上沒有人睇好，摩根大通的分析團隊上周末發報告指出，即使參與者達成凍產協議，一來總體的石油產量其實已經接近歷史最高水平，二來伊朗及利比亞一直以來都極力反對凍產的做法，預期只會繼續增加出產，對油價造成壓力。
另外，美國的頁岩油生產商此前已經講過，只要油價重上40美元水平，就有生存空間，所以，除非全球經濟，特別係中國經濟有明顯改善，原油需求量明顯提升，油價能夠長期保持在40美元水平之上，機會唔大。油價唔升，油氣股反彈將會行人止步，買咗能源股的朋友要睇餸食飯，唔好去得太盡。
陸羽仁
回應(0) 我想回應
陸羽仁 BLOG 舊文
來源 source: http://blogcity.me
