智取大市：風雨欲來先避一避
■滙市越chok，對於股市越不利。 資料圖片
滙市越chok，對於股市越不利。美滙指數微升同時，日圓滙價竟然大幅向上，而人民幣離岸價則相對美金更弱，方向大概決定了，就係向不利局面發展。如果以同一步伐發展落去，日圓、美元繼續強，人民幣繼續弱，更加會成為最不利嘅
scenario，全世界主要市場全部唔好過，攬住一齊跌。
究竟有幾不利？實在難以估計。睇圖嘅話，H股指數無力突破9000點左右嘅密集阻力區後，向下的話，7500點至8000點絕非強大支持位，從圖表上，推斷唔到大市可以有幾大潛在跌幅。氣氛方面，反而不算太差，噚日內銀股同石油股跌得比較多，但A股可以升超過1%，而一般二、三線H股普遍跌唔夠2%，甚至有中海發展（1138）同鞍鋼（347）可以升大約半成。形勢惡劣而投資者未肯走，究竟係壞消息未反映？定係股市夠承接力？反正成交少，難搵食，不如避一避更好，寧願賺少餐。
面對呢種狀況，有兩種選擇，反正氣氛麻麻，賺錢機會唔多，不如再離場一個月，番嚟先再睇；另一種選擇係，如果有貨在手唔捨得沽，可以用散紙買小量遠期超價外淡倉，輸曬冇所謂，但跌市真係殺到，分分鐘可以對沖股票持倉甚至手上物業，冇壞。最差嘅策略，可能係逢低分段吸納，不排除會越撈越跌，而變成看似穩陣、其實高風險嘅一著。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com
