電影股泡泡
2016年04月06日
伊朗講明未搶回被制裁前嘅市場份額前，係唔會減產承托油價。呢個講法一出，令油價再度受壓。家市場一聽油價跌，就驚銀行受累，所以日股再跌，搞到港股假期後先來個跌市。
次季開局唔靚仔
以前油價跌係好消息，特別係能源短缺嘅
工業國。點知家人人驚通縮，聞油價跌就當成壞消息，港股放完假就插。
有中環茶友話，評級公司喺三月結前後唱衰中、港。瑞信都來踩多中國一腳，董事總經理陳昌華坦言，對中國中長期經濟感到悲觀，看不到出路。現時內地需要面對結構性問題，當中去產能、減低槓桿等措施完全未見有任何改善，去年中國房地產市場暢旺，去庫存方面有輕微改善。相信去產能過程不會太長，因為一些企業當見到產業產生微利，便會再提升產能。
有中環茶友覺得，老外新季開頭就話降香港評級，又話繼續睇淡內地，雖然咁講唔係新消息，但都好有「做世界」嘅感覺，所以港股開局被人「糟質」絕唔出奇。特別嘅係港股插低之餘，內地股市無受外圍影響，顯示阿爺去年起拉閘放狗後，外面對A股影響減弱咗。
由於市場擔心主要產油國訂下的凍產協議難以達成共識，期油上日收跌2.96%，石油相關股份無運行。中海油(883) 收報8.59元，挫3.16%；中石化(386) 下滑2.57%，造4.93元；中石油(857) 降4.14%，造4.86元。
油價跌理應利好汽車股，但藉口話特斯拉(Tesla)新車Model 3定單熱爆，加上上海新能源汽車補貼新政策大縮水，累內地汽車股捱沽，大家都係做電動車，內地龍頭比亞迪(1211) 股價挫5.1%，造41.05元，為包尾的國企指數成份股；長城汽車(2333) 降3.78%，造5.85元；東風(489) 下滑2.98%，造9.13元；華晨(1114) 下滑5.41%，造7.17元；北京汽車(1958) 挫1.65%，造5.95元。
呢兩日市場話題係電影金像獎嘅《十年》，佢應唔應該得獎惹起話題。不過《十年》無得炒，內地電影相關股呢排炒作好火熱，天馬影視(1326) 喺主席黃百鳴增持下，就喪炒咗兩日。
天馬娛樂近半年動作多多。去年十月份公司公佈，與潛在賣方簽訂保密協議，獨家與第三方磋商賣盤，股份就已經炒咗大輪。到上月底，公司又話與第三方已終止商討賣盤，該股當日一度大跌24.7%，低見0.32元。
天馬股價大跌翌日，大股東兼主席黃百鳴在3月30日買入640萬股，但未有透露平均價，完成後黃百鳴持有天馬影視達48.5%。天馬股價第二日起急升，收復部份失地，到了4月1日愚人節，黃百鳴再從市場上購買1000萬股股份，自然又成為刺激股價因素。隻股昨日大升，收市股價急升15%，報收0.425元。
黃百鳴拍戲叻炒股都叻
陸羽仁喺私人場合，曾經同黃百鳴有幾面之緣。佢喺台前係出色笑匠，形象半儍兼好好人，現實上就有啲嚴肅，係個好成功嘅電影老闆，過去買賣電影公司股份都係贏多輸少，今次佢玩回馬槍，情況都有啲戲劇化。
天馬家市值只係10億元，從炒作角度貨源唔算多，但若然講賺錢，就無人敢講佢賺定係蝕，因為做生意有時個場愈旺，生意愈難做，尤其電影係好講眼光同投機性，所以至今唔見到香港有大電影公司做到藍籌，呢類股份亦都唔建議長揸，總之快上快落，要自己執生。
電影股炒作熱潮方興未艾，主要動力係喺內地嚟。若然你問市況健唔健康，好多人都會話泡泡哋，但炒股如果無泡就唔好玩，好似飲啤酒，泡泡哋就最易入口，但最緊要係適可而止，唔好醉到斷片就得嘞。
陸羽仁
金融High Tea 舊文
來源 source: http://hdfin.stheadline.com
