智取大市：大時代炒爆的原因
■人行舊年4月減存準、5月再減息，令到理應平靜嘅第二季熱鬧起嚟。 資料圖片
今日係大時代一周年，呢個時候除咗睇《蘋果》條「股阿莫」笑嚇外，亦值得研究大時代點嚟，對後市有乜前瞻性。大時代並非喺石頭爆出嚟，事後孔明係大有原因，大家以為係公募基金放寬落嚟炒港股，但
只係藥引，重要係貨幣政策。
由2009年四萬億開始，中央習慣每年上半年收水，下半年放水，股市亦以上半年較差，下半年較好，原因包括應付農曆新年資金需求後，市場會有多餘遊資，唔能夠放太多水令資金氾濫；另方面內銀每季都有放貸quota，春節容易爆quota，第二季特別手緊。年中開始，中央摸清形勢，下半年通常鬆手放水，順便畀內銀跑數。
去到2015年形勢有啲唔同，人行喺2月減息，大家意識到上半年冇收水嘅意外驚喜，掉番轉仲要放水，加埋公募基金單嘢，仲唔爆上？
人行舊年4月減存準率1個百分點，5月再減息，令到理應平靜嘅第二季，突然熱鬧起嚟，本來第一季取態審慎嘅基金經理，都逼住第二季追貨，點知6月物極必反，炒爆咗。
望番現時，人民幣有貶值壓力，減息掉番轉令離岸人仔受壓而釀成走資，禍害更大，所以刺激經濟、股市，貨幣政策冇太大發揮空間。如果人仔壓力未消，拖累下半年放水，就對中港股不利，資本市場似乎仲未足夠反映呢個因素。
晉佳
https://www.facebook.com/advanceguy1/
晉佳
智取大市 - 晉佳 舊文
來源 source: http://hk.apple.nextmedia.com
