智取大市：風險用注碼控制
■脫歐在民調中大幅領先之際，倫敦股市跌幅都唔算太恐慌。 資料圖片
港股突然跌529點，藍籌股表現差，跌勢蔓延到終極強勢龍頭股騰訊（700），但論二、三線股慘況，似冇上周五情況咁差。若純粹因沽壓去到龍頭股，加上指數同個股已進入短線超賣，就話港股可能跌到差唔多，
小弟認為有點武斷。
周小川、尚福林同劉士余三巨頭玩失蹤，顯示MSCI納入A股無望，亦唔排除係為應付英國可能脫歐而做準備，所以終極決定因素係英國脫唔脫歐。由升市變政治市，投資者心理狀況由安穩變成唔安穩，難怪港股跌咁多。政治市最討厭之處，就係股民隨時隨地被民調結果戲弄，完全冇路捉。
脫歐民調大幅領先之際，倫敦股市跌幅都唔算太恐慌，係咪外界吹得太大，一味靠嚇等英國人唔贊成脫歐？答你唔到。
作為股民，只能冷靜處理，面前有兩個可能，第一，英國真脫歐，原來會好恐慌，環球股市重覆類似今年1月跌市；第二，市場慢慢冷靜應對壞消息，然後慢慢爬上去。估就估第二個可能性較大，但估啱估錯都係戶口裏面啲錢，事關重大，所以難免跟市場同一風向，一切以減低注碼去控制風險。
晉佳
http://www.fb.com/advanceguy1
《國策透視》暫停一期
晉佳
智取大市 - 晉佳 舊文
來源 source: http://hk.apple.nextmedia.com
