平衡風險遊戲
2016/06/14 09:36:14
網誌分類: 經濟
全球股市昨日無情情又搞出個小災，當中以亞洲股市死得最慘，日本股市勁跌3.5%，內地A股跌3.3%，港股跌2.5%，南韓亦跌1.9%，跌浪傳到歐洲，德國及法國股市繼上周五下跌超過2%以後，昨日再挫近2%。外圍唔得，美股亦
唔掂，不過跌勢已經減緩，杜指跌133點，收17732點，跌幅0.7%。
昨日的跌市只有兩字解釋：「恐懼」，其中之一是英國可能脫歐之風險。你睇股票恐懼指標VIX指數昨日抽高23%至20.97，係2月25日以來最高，而且係連續第六日上升，就可見一斑。
投資對後市的恐懼來自幾個不確定因素，最大的當然係6月23日英國舉行的「脫歐」公投，上周五有幾個民意調查都顯示英國人贊成英國脫離歐盟的人數都略為多過反對的，英國《衛報》的最新民意調查，贊成留歐是47%，脫歐是53%，脫歐暫時領先5個百分點。雖然全民投票最後有好大變數，但呢種數字都足夠令市場驚慌。
BBH的分析部門主管March Chandler昨日就表示，若英國離開歐盟，將對全球資本市場造成巨大衝擊。由於公投在下周四舉行，不確定因素未清除，環球股市呢段期間仍會反覆受壓。
第二個不確定因素係美國聯儲局及日本央行都會於今個星期召開議息會議。市場已經認為美國聯儲局6月加息的機會微乎其微，但一日未揭盅，仍然唔敢貿然行動。此時此刻的全球投資者對股市腳軟軟，一向被視為比較安全的日元，自然視為資金避險港，日元本來已經承受強大的升值壓力，昨日又傳出日本央行可能會今次會議上延遲減息，會等到秋季推出財政刺激計劃時才一併推行。
OANDA Asia Pacific的資深外幣交易員Stephen Innes指出，日本央行此舉將推升日元匯價。事實上，消息令到日元兌美日由上周五的107.05日元跌一路升上昨日中午的105.75日元。日元急飆就拖累到日股急跌，連整個亞洲股市都拖冧埋。
昨日講債王格羅斯話債價係500年以來最高，賭債價要跌，債息要回升，我話散戶如果信佢，手上有領展呢類公用收息股應該要沽，而且風險無債王咁大。網友睇完話唔明點解債王有風險，散戶無風險，我可以再解解。
首先係如今債價大升、債息大跌，係避險心理作祟。大戶的行為通常係和市場逆反，例如股價升到好高時，大戶就會出貨，所以才有「大戶出貨，越沽越高」之說，因為佢地貨量大，不和市場情緒相反行事，好難出貨，以沽貨為例，就要在市場好睇好時沽貨。
除了要搵人接貨的考慮，在大戶眼中，市場是週期性的，走一個方向太盡，就會回頭，所以在市場充斥著一種情緒時，和他對著幹，等呢種情緒平伏，大市轉向，大戶就會贏錢。例如如今市場太恐慌，債價升到顛，債王就賭到市場平靜下來後，債價就會大跌。
呢種手法的風險是出現黑天鵝，個市不但不是朝大戶預計的方向回頭，而是照去，而且不是去少少，而是出現黑天鵝，再去好多，咁大戶就會輸大錢。
到呢個時候，就要睇大戶有無財力守，例如債王賭債價跌，到底佢係大手沽出佢持有的債券，還是以衍生工具沽空債券?若是沽出現貨債券，債價再升，他作為基金經理，組合表現會跑輸大市。若然佢係用衍生工具狂沽，咁就唔止跑輸大市，係可能會輸鑊甘，呢啲情況佢地可能會定止蝕，根本唔會死守。
散戶如果只是沽出手上的收息公用股，風險有限，以領展為例，昨收51.05元，歷史高位是去年2月的53.65元，今次係唔係去到去年高位成疑。萬一出現黑天鵝，英國脫歐，我估領展上穿高位，去到55、56元都幾盡，唔好忘記領展一年低位40.5元，上完高位，未來一年見番40.5元的機會亦唔細，所沽一沽有值博率。
散戶買賣股，就係一個衡量風險的遊戲。
陸羽仁
回應(3) 我想回應
陸羽仁 BLOG 舊文
來源 source: http://blogcity.me
