財經評論：
體壇盛事輸多贏少
■奪得巴西奧運獨家播映權的電視廣播，已表明轉播奧運不會賺錢。 資料圖片
今個夏天，足球界接連有美洲國家盃同歐洲國家盃，之後更加是四年一度的奧運，體育版的行家呢個暑假的確有排忙，球迷以至體育迷都應該無覺好瞓。不過，逢親有大型體育賽事，到底可以為市場產生幾多經濟效益，
多年來聽到的答案都是「輸多贏少」。加上近年全球經濟氣氛都唔多理想，想淡市中突圍，難度甚高。
以主辦今年奧運的巴西為例，兩年前先搞完世界盃，今年在里約熱內盧搞埋奧運，三年內兩度主辦體壇盛事，其實都幾吃力，特別是這個已褪色的「金磚國家」，從金磚變回爛銅，治安問題又多，嚴重財政赤字、經濟收縮、幣值下跌，失業率又再創新高逾一成，失業人口達到過千萬人，就業形勢嚴峻。巴西政府窮於應付上述種種問題下，外界都唔多睇好今次奧運可以搞得好之餘，相信幫唔到巴西經濟幾多。
貼身少少，講香港，奪得巴西奧運獨家播映權的傳統電視霸主電視廣播（511），已表明轉播奧運不會賺錢，更要補貼1.5億元製作，加上今年經濟欠佳，令廣告收入下滑，講到明今年業績不會有驚喜。未播已提早打定輸數，料會虧蝕。
零售市道方面，Nike東九龍最大型旗艦店，剛於5月進駐觀塘大型商場apm，取代中原電器承租四樓約7,000方呎樓面，明顯想食正大型體育賽事條水。
之不過，到近年網購hit到爆之下，旗艦店往往成為買家試身室，試好size再去網店買，一般平一成以上，搞到旗艦店旺丁不旺財。雖然apm場主新地（016）未公佈過相關最新營業數據，但估計都唔會因為多一間Nike而好得好多。
記者：黃嘉銘
財經評論 舊文
來源 source: http://hk.apple.nextmedia.com
