中環在線：唔驚經濟差
嶽少再開檔
■嶽少（左）噚日有新餐廳開張，原來同主廚Umberto Bombana相識已久。 
旅發局主席林建嶽識飲識食，旗下有近廿間中西日式高檔餐廳，噚日又有間意大利餐廳CIAK-All Day Ital
ian喺太古城正式開張，嶽少抽咗廿分鐘主持剪綵儀式，來去匆匆。
嶽少旗下餐廳出名質素有保證，亦多數屬於高消費，新開呢間CIAK喺中環置地廣場都有一間，走中檔路線，人均消費約200至400元。另一間同樣喺置地嘅唐人館稍後亦過海喺尖沙嘴開多間。家陣香港經濟麻麻哋，難得嶽少冇有怕，餐廳繼續開。
佢同華華講，就算經濟差，香港人仍有消費意欲，佢開餐廳，亦計過條數，唔做蝕本生意；嚟緊除咗高檔食肆，佢希望繼續發展中檔食肆。
想將飲食王國上市
講到開餐廳嘅心得，佢認為大廚最重要，但唔係就咁請佢哋來港開餐廳就得，事關香港人與外國人口味大不同。
佢舉例，香港人未必鍾意地道嘅西班牙菜，因西班牙菜較鹹，味道重，又要配酒；外國人食甜品偏甜，香港人亦未必like；所以佢每次都要同大廚傾，大家有商有量，將菜式調校到適合香港人嘅口味。負責CIAK嘅米芝蓮三星名廚Umberto Bombana就同嶽少合作逾10年。嶽少嘅飲食王國越做越大，佢不諱言做到咁上下，當然想將盤生意上市喇。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
