金手指：英國脫歐公投賭局
■一旦脫歐，英鎊一定大插。就算事前已插到落「10算」都應會繼續。 資料圖片
孫柏文當年做戒酒療程，其中一環係分享心裏屈咗喺到嘅嘢。當年，我就分享咗我對世界各國管治嘅不滿。個結論係，唔知嘅人，繼續被騙，知嘅人就唔出聲。
點知，過咗咁多年後，美國特朗普、德國「A
fD」、希臘「Syriza」、意大利五星運動等相繼湧現，連香港都有建制派「大佬中之大佬」出燈謎叫我哋喺下屆特首選擇過程要「拒絕欽點」。世人，原來真係會醒。而喺英國，就係脫歐公投。
咁會唔會脫呢？民調，廢嘅。因外國民調會計埋各種人究竟會唔會去投票，而以前啲數據，特別係關於各類支持者會否投票機會率，已出巨變。咁好多人話睇賠率最準，sorry，特朗普喺2月初選進行後都仲有七倍，死未。所以冇得估。
我姑姐姑媽，都喺四十年前已移居英國。兩個都喺70年代嗰轉公投，投入歐。姑媽，藍中之藍，次次選舉投保守黨，今次投「脫」。姑姐，紅中之紅，1983年，就算工黨用嗰份被形容為「史上最長的政治遺書」左到共產嘅政綱去參選，照投。姑姐話佢喺1997年開始唔投票，因覺得貝理雅已偏離為工人出聲。今次會點投？脫，仲要周圍叫朋友投「脫」。兩個都話因現歐盟體制，唔係佢哋40年前支持加入嗰個。
我個嫁咗過英國嘅阿妹，同佢老公，則投「留」。阿妹係英國公僕，覺得冇歐盟，佢嗰行啲人（醫生）就會工作時間加長，妹夫則覺得歐盟係未來。雖屋企人都五五，不過睇到投票意欲，肯定係姑媽姑姐贏。
咁如果冇得估，點賭呢？如果冇得估，事前落錯邊會輸死。所以，炒英國脫歐嘅方法，就係等選舉結果。而如果留，就當冇事發生過。
不過一旦脫歐，英鎊就一定大插。就算事前已插到落「10算」，應該會繼續插。雖然我唔知佢哋點計，多數憑空老作，不過啲行嘅分析員已經話一但脫歐，一英鎊會跌到得1.25美元。即滙做港元，「9算」。
不過插落去嗰刻，就係訓身買之時。情況有如去年瑞郎同歐元脫鈎嗰次一樣。當時，幾個鐘內，1歐元滙1.25瑞郎，變成1歐元滙0.85瑞郎。之後又幾個鐘，歐元反彈，到大約一對一。不過，我絕對唔建議做槓桿咁炒，用瑞郎歐元作例子，你睇住佢由1.2去到1時，一個唔好彩沽瑞郎揸歐元，數分鐘後已經margin call。不過冇做槓桿捱得住的話，嗰日埋單有錢贏。
英國，當佢哋脫歐後擺脫歐盟啲被大企業說客騎劫咗嘅條例定立，必定比家陣更富貴。所以一旦脫歐，嗰晚插落來，就係一注獨贏、不問價追之時！連我都會將部份白銀轉去買！
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
