智取大市：凶兆現身本周沽
■反正港股上升周期可能完結，散戶不妨等下個機會來臨先再搏殺。 資料圖片
恒指周線大陰燭穿頭破腳形態正式確認，如果重覆過往趨勢，上星期高位24064點半年內好大機會一去不返，途中至少見到2,000點跌幅，按上周五收市價計算，即係去到21233點或更低。
往績
係咪咁可靠？中線升浪高位出現穿頭破腳，本來係技術見頂訊號，往績只係加強技術形態嘅可靠程度。
會即刻跌？定係慢慢跌？睇番2008年到𠵱家，六次周線大陰燭穿頭破腳後，有兩次直插冇水花，有三次反彈唔夠一個星期就步入跌浪，剩番一次係港股大時代後嘅6月，指數反覆約一個月先大插，但反覆期間，非藍籌股早已跌到四腳朝天。即刻話最多頂到一個星期，沽壓就會嚟。
跌市有冇基本因素支持？事實上呢三個月嘅升市亦冇乜實質基本因素支持。港股7月由跌轉升係因為壞消息反映得七七八八，直至升到深港通之類嘅利好消息全面反映，市場再關注嘅利淡消息出現，就可以令港股轉升為跌，好淡消息夾雜構成一種股市窄幅上落周期。恒指20000點同24000點之間，大概係市賬率1.03倍同1.24倍，喺今時今日呢個千瘡百孔嘅金融世界，反正中線上升周期可能完結，不如等下個機會來臨先再搏。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
