經濟客艙：傑青和廢青的分界
■「傑青」黃仰芳表示，想享受成功回報，須先經歷成長痛苦。 資料圖片
不吃不喝不玩N年換層自住樓，好多人話咁樣生活「堅離地」。聽落生活好似冇曬意義，其實大家都係物質主義包圍下，已經忘記咗經濟學最基本道理。
放棄目前消費來換取未來消費，係
投資理財一個大學問，所以「傑青」黃仰芳嘅買樓奮鬥史唔係教壞細路，佢自己都講想享受成功回報，先經歷成長痛苦。痛苦或者犧牲，聽落好沉重，講到底都係人生嘅選擇，識得揀，先至係人生嘅老闆。
上網睇到一篇網絡勵志文講「窮人」同「有錢人」嘅分別，原來係人生嘅加、減法。窮人被壓抑嘅慾望太多，所以人生多數用「減法」，分配想要嘅資源。有1,000蚊，就用200蚊買乜乜，另外用600蚊買乜乜，剩番嘅200蚊再算；「有錢人」唔係冇慾望，但會用「加法」去得到更多嘅目標，如果有1,000蚊，要點樣先變到2,000蚊，繼而獲取更多。呢套人生加減法則，都係建議暫且放棄現眼前嘅消費，「犧牲」同「經歷痛苦」後，再實現目標。個故仔冇話邊個對或錯，而喺呢個世代，識得選擇比任何嘢都更重要。
如果話「傑青」人生目標只有買樓，對社會冇乜貢獻，炒股收息咪一樣，對實際經濟有幾多貢獻？𠵱家仲喺百業待興，肯搏肯捱就可以有機會發達嘅世界？點解家陣有部份大學畢業生，搵唔到工，或者成為在職貧窮一族，收入同生活質素不成正比。上個世紀，錢係努力賺番嚟；但家陣嘅錢係「印」出嚟。去銀行低息貸款買樓，再樓換樓，過程對社會「零」貢獻，但係係最快攀升嘅社會階梯。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
