財經評論：
最貼地樓市講故佬
■《瑪嘉烈與大衛的綠豆》劇照
講起「住」，你我他都有一肚冤屈不吐不快。
無樓的，恨上車；有樓的，煩換樓；住舊樓，愁夾錢大維修；住新樓，捱天價管理費；至於租客的故事，更像是21世紀農奴。
居住問題令大家一肚氣，繼而衍生許多以此為題的影視作品。一曲「是誰令青山也變，
變了俗氣的嘴臉」唱出土豪劣紳丁權暴利的《竊聽風雲3》、藉血腥暴力控訴樓市失衡的《維多利亞壹號》、由化骨龍主演的《失戀急讓》低頭吐出一句「有仆街客先有仆街經紀！」可謂道盡代理心聲。
不過，電影情節總是過於戲劇化，如果要我選最貼地的樓市講故佬，我揀ViuTV。
談不上很喜愛ViuTV，太多節目雷聲大雨點少，例如《跟住矛盾去旅行》剪接拖遝、《G-1格鬥會》場外嘴炮好看過八角籠內花拳繡腿、太相近的旅遊節目令人審美疲勞，但感覺到他們的自家劇或者節目裏頭，對「樓」或者地產相關的事，有花心思去處理。
例如《瑪嘉烈與大衛的綠豆》，男女主角因層樓落名的問題而爭執，源由生活化到像真實發生過：
「你（買樓）最好唔好寫埋我個名落去，因為如果有一日我哋分手，你知分身家好鬼麻煩。」
「唔幫手供梗係唔落你名喇。」
「你咁諗嘢嫁，之前又話咩我係你最後一個，其實咪又係唔愛。」
「愛唔愛唔係攞層樓黎衝量嫁嘛。OK！我層樓落左你名就等於愛你？係咪咁簡單先？」
「如果你寫咗我個名就唔一定係愛嘅，但你唔寫我個名就一定係唔愛！」
「我就係唔想兩個人因為一層樓搞到咁囉！」
「咁你就唔好咁計較啦！」
其後接力的處境劇《三一如三》更直接以空舖湧現為引子，虛構出一舖分時段三組租客共存故事，設定比大台拿電視台裡塘水滾塘魚故事拍成處境劇，來得有誠意。
又或者實驗性質較重的《建築．我城》，循生活文化的角度去解構本地建築。截稿前剛在網上看完第一集，雖然不理解為何主持要是黃修平導演，但欣賞節目組在嘗試再構建半世紀前的唐樓生活花了很大力氣。
記者：陳東陽
財經評論 舊文
來源 source: http://hk.apple.nextmedia.com
