中環在線：
情人節萬元玫瑰多人訂
聽日情人節，又係一年一度「藉住束花說愛你」嘅日子。雖然話股市反覆，唔係人人有錢賺，但送花畀女友、老婆依然係大事（尤其係中環OL）。中環一間花店嘅負責人都話
，今年熟客依然闊綽，即使比平時加價40至50%都冇講價，價值9,800元一束100支玫瑰，亦收到超過10張定單。
中環花店：佢哋唔講價
位於中環核心地帶嘅皇九，入面有間花店開咗幾十年，負責人曾先生最清楚送花嘅意義嘞。佢話，中環人只求件事好好睇睇，花夠靚，「錢？佢哋真係唔同我哋講價，畀張（信用）卡你碌」。咪以為男人只會送花畀女友，曾先生話，唔少熟客係送花冧老婆㗎。
曾先生呢間花店舖面唔大，但佢話單係做樓上樓下熟客已經好忙，以往幾年情人節又撞假期又撞新年，今年難得係平日，預咗需求大，入貨係平時十倍。
但佢冇瘋狂加價，平時一束1,300元嘅玫瑰，情人節都係收1,800元，加40%，相比一般加價70、80%算輕手。截至上周五，佢收到過百束花嘅定單，肯定要趕通宵。佢仲準備咗秘密武器，就係大台新聞王子方東昇提過嘅厄瓜多爾玫瑰，花頭有隻手咁大；仲有來自法國，平時主要用來製香水嘅Mimosa（含羞草花）、荷蘭鬱金香。
據講，特別嘅花難保養兼要空運，成本唔平，加上情人節，女友、老婆冇花揸手，冇得post相上facebook，黑面黑足一年，條數仲難計呀，有啲錢係要花嘅。
李華華
mailto:LiWaWa@AppleDaily.com
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
