智取大市：短炒絕殺靠一招
■如果要買旗形股，可以留意兗煤。圖為兗煤執行董事吳玉祥。 資料圖片
港股上周四、五成交激增，但資金換馬炒唔同中資板塊，冇派貨徵兆，係好兆頭，證明喺散戶開始活躍之時，大戶竟然未諗住撤退，稍後就能夠萬眾同樂。有股向上突破就實有散戶跟衝，股價升幅擴大，利潤大咗，又
有埋exit位食糊，成個市有機會進入easy mode。
800億至900億元成交，無可否認係活躍水平，但又未夠買到大部份股份同時爆升，所以暫時只能輪流炒。窮追破頂股的話，股份出現兩支大陽燭之後，大戶有機會套現轉炒其他板塊，與其追破頂，不如買上升旗形股。
一批強勢股之前升到停唔到，進入整固後，再翻炒向上動力一定大，渣打（2888）回吐三日後，周五即升3%破旗已屬一例。再數之前中聯重科（1157）亦係典型例子。
如果要買旗形股，仲可以留意大大細細嘅煤電股，兗煤（1171）大隻得嚟波幅夠大，形態同9月底爆升前極相似，唔錯！穩陣啲仲有華潤電力（836）。
注碼點分配？如果有盈利在手，不妨每注加大少少注碼。另外，每日收市檢視一嚇持倉，將最弱或最冇前途一至兩隻換走，買入最有前途、最有動力一至兩隻股份，保持倉位全攻得嚟仲要強勢，就能有風駛盡雋。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
