經濟客艙：新移民媽媽怎煉成
■近期有新移民阿媽投資千萬買樓。
人望高處，決心離開別井，也就是為咗追求更好嘅生活。移民絕對係一門生意，為咗一本別國護照，錢就要洗，簡單點就係投資同買樓。作為最熱衷投資移民嘅中國人，海外移民潮已經經歷好幾個十年，但「新移民」仍然輕易被人
推為「負皮王」，始終同「融入」兩個字扯唔上關係。
家陣有能力移民嘅中國人，都係比較富裕嘅一群，亦可能係國家最冇安全感嘅一群。佢哋寧願出國做二等公民，都唔想留喺內地面對嚴重空氣汙染、食品問題同無言論自由嘅一等公民。所以，投資移民成為中國人出走其中一個捷徑。如果佢哋有子女，亦想盡辦法送子女出國讀書，講到底都係對國家教育制度冇信心，希望下一代有個國際認可學位，增強競爭力。
星期六有位新移民阿媽投資千萬買樓，博阿女入讀心水名校，看得出新移民媽媽嘅苦心，其實同好多港爸港媽一樣得，如果真係有錢，不惜做「現代孟母」搬入名校網，增加子女入讀心水名校嘅機會。呢位新移民阿媽被人問到雙非童搶學位同內地人來港搶資源問題就爆哂SEED，反駁自己喺香港有納稅比香港人更多，相比「好吃懶做」嘅港人好好多。
好明白呢位阿媽嘅怨氣。聽過好多新移民為咗香港永久居民身分證，頭幾年只得三個月簽證來港，頭幾年中港兩頭走續辦簽證，等夠七年先有三粒星到手，都唔係完全冇付出過嘅。不過，新移民媽媽嘅說話卻戳中港人要害，港人並非憎人富貴，其實我哋嘅阿爺阿嫲都係來自內地，用納稅人嘅錢幫番對社會有貢獻嘅人係心甘情願，但如果來港買樓為求資產保值，藏富於港，投資移民係幫梗香港經濟發展嘅話，同時又想喺香港攞到得同等社會福利，未必個個港人都接受。政府與其收緊內地新來港人士嘅數目，不如好似丹麥咁搞個筆試考嚇新移民對香港嘅熟悉程度，阻止來港搵著數嘅新移民，例如問嚇港島搭叮叮，小童一程要幾錢、香港2017年邊兩間中菜廳獲米芝蓮三粒星，以及香港末代港督的名字。
Captain Cool
https://www.facebook.com/seeforcaptain/
本欄逢周一刊出
Captain Cool
經濟客艙 - Captain Cool 舊文
來源 source: http://hk.apple.nextmedia.com
