【不問價追】下隻至抵家電（小炒王梁心欣）（第117期）
2017-3-23 17:00:08
小炒王屋企有部分電器仲好原始，例如家人日日睇嘅史前古董Plasma（睇足十年，如果唔係啲顏色開始變，相信仲會用多一陣）結果受唔住媽咪嘅催促換咗一部49吋嘅大電視。望過韓國牌子和日
本牌子，選來選去都揀唔啱，特別係媽媽要求要睇YouTube，最終我揀咗呢一部「性價比」相當強嘅電視機……
睇來睇去，都覺得呢一部TCL非常之順眼，遙控上面仲有「YouTube」嘅按鈕，我覺得非常之方便。（因為一開電視可以睇我嘛）講真，用內地嘅電視機都係首次，既然買得，梗係研究下隻股票啦。
TCL多媒體（01070.HK）截至舊年底，盈利大升608%，溢利有1.83億元。睇返個原因，原來就係我呢批換電視機嘅客人帶挈，睇返盤數，原來佢哋嘅高端產品包括4K同埋大屏幕電視機嘅佔比逐步提升，好似4K電視機銷售量在中國已經有283萬台，佔整體市場LCD電視機銷量36%；曲面電視機市場佔有率係30.4%，係國內品牌市場排名第一。
香港人買TCL唔出奇，最奇係英、美兩地都有捧場客。紐約時報報道TCL 2016年全球電視出貨量超過2000萬台，係繼Samsung、LG之後第三個年出貨量突破2000萬的電視企業。唔怪之小炒王屋企都多咗部啦。科技嘅嘢，小炒王就唔多識，但都聽過咩叫做「量子點電視」，之前啲廠商猛推的OLED電視，天生壽命比較短兼且畫面有殘影，價錢仲要偏貴。但量子點電視係採用新型嘅磨機發光材料，圖像表現更佳兼且勝在價錢平，唔怪之得唔使4000蚊就有部49吋大大部嘅電視係我眼前出現。
無買海信科龍（00921.HK）的你係咪眼擎擎無曬心機？上幾期都叫大家捕住隻海信科龍以及舜宇光學（02382.HK），真係北水帶領、逢低必吸。至於隻1070，起步都未起，簡直唔可以同海信科龍相提並論，睇返日線圖，業績前正正企實條10天線大約$3.7的位置，如果要追，現水平都可以吸納，初步上望$4.2的水平，內地家電銷售大增係眼前事實，只係香港人感受唔到，從買嘢思維出發，TCL絕對值博。
不問價追 - 小炒王梁心欣 舊文
來源 source: http://www.winmoney.hk
