【實力取勝】林小珍好腳頭（陳承龍）（第117期）
2017-3-23 16:00:19
做得炒家，實力同運氣都要有，所以有時都幾講運，或者相信運。小弟嘅財經數碼媒體「策略王直播室」（係，我哋唔用網台呢個咁out-dated嘅term），搵咗大台前主播林小珍嚟幫手，主持朝早時段，
啱啱寫呢篇文嗰朝，就試咗第一次trail run。由開始搵林小珍到林小珍真係肯過嚟幫小弟手，恒生指數就由23500點水平，升到24600點，相當好腳頭，呢個除咗令我哋財經數碼媒體嘅同事士氣大振，亦造福股民，人人有錢賺。嗱，講到興起，唔爭在爆埋畀大家知，未來除咗有小弟同「慧慧」劉慧，仲會有《小魚大茶飯》嘅江小魚、資深傳媒人兼《策略王》創辦人李鴻彥、高登網民最愛嘅沈大師沈振盈、啱啱轉咗新行嘅郭Sir郭思治輪流開咪，同大家分享金股匯心得，其實仲好多猛人加盟，但賣個關子先啦，大家留意我哋facebook fanpage同直播，就會知道我哋未來發展。
講番個市，自從林小珍加盟我哋後（Sorry，又要提提佢），除咗恒生指數上升，成交都暢旺返，日日都有接近千億元成交，開始有返資金市個feel。先有內銀股炒先，建行（00939.HK）、工行（01398.HK）、中行（03988.HK）都創一年新高，之後又炒到花樣年（01777.HK）、碧桂園（02007.HK）和中海外宏洋（00081.HK）呢幾隻二線內房，即使內地出咗樓市調控新政，大家以為內房玩完，但結果一樣升，好似之前我哋極力推介、恒地（00012.HK）李家傑都有貨嘅珠光控股（01176.HK），弱勢咗咁耐都上返一個月高位，證明遊資真係好充裕，睇嚟只要佢升穿「李家傑接貨價」0.8元，衝上關口都係easy job。
另一個遊資充裕嘅例子，就係近排嘅焦點美圖公司（01357.HK）。呢隻股以8.5元公開招股時，好多入大飛嘅投資者都抽飛，令到佢上市時穿咗招股價，當佢上水兼去到10蚊水平，好多大行見呢隻股連盈利都冇，所以紛紛沽貨，不過中國資金瘋狂買入，令隻股連升超過10日去到23蚊水平，之後又連續兩日急插落14蚊水平，冇盈利嘅股票都暴升暴跌，呢啲就正正係資金市嘅表現。
至於後市炒乜？呢期好多潛水半新股都好好炒，例如禦佳控股（03789.HK）喺低位連爆三支陽燭，直撲招股價0.56元；另一隻善樂國際（01660.HK）走勢都相同。大家睇返策略王雜誌專欄「新股報告」個表，其實好多都已經浮返水，如果有心研究嚇仲未上水股份嘅走勢，搵到翻版禦佳應該好容易。既然嚟到資金市，除咗見異動股就衝之外，儲定一批細價股都係指定動作，好似家夢控股（08101.HK）同凱華（00275.HK），儲定都係時候。有fans喺我直播室問家夢升咗好多，追唔追得喎，喂阿哥，呢啲股要儲㗎嘛，見低就要買，呢個就係小弟喺資金市畀大家最大嘅錦囊。
#實力取勝 #陳承龍
實力取勝 - 陳承龍 舊文
來源 source: http://www.winmoney.hk
