【股場解密】中糧肉食上升空間非常吸引（歐陽風）（MAR 24）
2017-3-23 22:17:04
巴西黑心肉事件持續發酵，由於本港有多達1/3肉類由巴西入口，暫停進口巴西肉類之後，肉價勢必大漲，尤其3星期後巴西肉類存貨將會耗盡，到時肉價又會再升。
受惠股主要是萬洲（00288
.HK），除了受惠豬肉製品價格上漲，本身業績亦都吸引，高盛、大和及里昂等大行全部出動唱好，目標價8元左右，呢個價位睇升多兩成以上，確係相當吸引。
至於同類股，有一隻其實仲大潛力炒起，中糧集團旗下，去年11月才上市的半新股中糧肉食（01610.HK），一掛牌首份業績就有盈喜，月前通告稱其去年度純利將不少於8.5億元（人民幣‧下同），按年大增4.6倍。公司解釋，盈利上升主因是豬價回升，帶動集團的生豬養殖業務，加上成本持續下跌及銷售網絡改善，新鮮豬肉及肉製品等主要產品銷售有增長。
作為中糧肉食保薦人的大摩曾發表研究報告，基於該股現價為2017年市盈率預測6倍，估值相對同業吸引，故給予其「增持」評級，目標價2.5元。2.5元目標價，相比起今日收市價1.85元，有0.65元上升空間，即係睇升35%，更加吸引！
中糧肉食去年11月上市時遇正市況欠佳，公開招股部分只錄得約43%的認購，國際發售則獲得適度超額認購，以招股價下限2元定價，上市後仍要「潛水」，不過呢類半新股不排除是上市時刻意壓低收貨，等收夠即可一飛衝天，而業績公布會是催化劑，等出完業績即時炒上。呢個價位，隨時吼住入貨。
#股場解密 #歐陽風
作者簡介：擅長鑽研公司通告與財務報表，發掘細價股、財技股及增長股
股場解密 - 歐陽風 舊文
來源 source: http://www.winmoney.hk
