智取大市：趙薇機會在明天
■趙薇
啱啱過咗41歲生日嘅趙薇，當初由影星變影後，變埋股後，再陷入肖建華案，買A股冇錢找數大大鑊，大家買定花生等睇人仆街之際，佢或者會表演多次絕地翻身畀你睇。
21歲憑住《還珠格格》走紅，固然係佢人生一大轉捩點，但能夠令昔日嘅趙薇蛻變成為今日嘅趙薇，可能係
一樽屎。不能不提2001年嘅軍旗服事件，趙薇穿著以日本軍國主義旗幟設計連身裙嘅照片曝光，激嬲近13億人之餘，當年12月尾畀人衝上台當眾淋屎。對於靠面子搵食嘅藝人嚟講，如斯打擊可以提早收檔。趙薇其後幾年變得低調，封殺令持續幾年都未完，呢段日子，應該令趙薇作出好大嘅改變。鑄成呢一次大錯，絕地翻身分分鐘難過由零開始，就要有十倍奉還嘅決心。
面對咁大嘅難關，正常已game over，但趙薇選擇等機會，然後一而再、再而三打出漂亮翻身戰。換轉當年佢抵受唔住打擊嘅話，退出幕前，或許到今時今日，大家一提起「趙薇」兩個字，就會記起啲屎屎尿尿。十幾年間，𠵱家大家一提起趙薇呢個名，影後？富豪？奇女子？趙薇既然反擊過一次，第二次會點？希望傳奇故事仲未完。
晉佳
http://www.fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.apple.nextmedia.com
