金手指：加息十次樓也不跌
■現在香港樓價高企。 資料圖片
作為金手指嘅fan屎，你今日睇到呢條題，可能會話：「孫柏文！你唔係話利息升，樓價就會跌嘅咩？點解今日的我，打倒作日的我？」
冇錯，聯儲局已加息三次，不過每個周末，本報都繼續報道啲超驚嚇嘅成交價。而今日條題，我都要認係有少少誤導
，疑似畀大家一個轉軚感覺，不過我都唔知幾堅定。因為我深信，加息加到第11次，樓市就會跌。
點解？其實我早前都講過，真正會推低樓價，必定係「最優惠利率」（即Prime rate）。而P一升，樓價就會跌。問題係，聯儲局左右嘅銀行同業拆息（HIBOR，「H」率），可以跑先好多，P都唔鬱。而根據上個加息周期（即遠古咸豐年代），聯儲局要由最低1厘，加到2.5厘後，香港P先開始升。因為今次聯儲局加息，係由0厘起步，而如果每次加息0.25厘，真係加10次先到2.5厘。加到第11次，P先鬱。而如果聯儲局加息速度，用遠比市場現預期快嘅每兩次會加息一次，就要去到2019年，P先會升。
當然上次加息浪，香港少好多用P減到近3厘做封頂嘅H掛鈎按揭。即H升，可好快令銀行畀存戶嘅利息，高過被封頂嘅債仔利息，搞到銀行倒貼。所以今轉啲銀行，加P嘅速度可以比上轉快好多。雖然我打死都唔買樓，不過加埋周日嘅結果，香港土地供應唔見會增多嘅情況下，大家你諗你。
最後，之前推介過嘅彩星玩具（869）出業績，噚日高明兄喺佢〈笑到最後〉專欄嘅分析同繼續持有嘅建議，我冇異議。
孫柏文
獨立股評人
http://www.fb.com/shuen
本欄逢周二刊出
孫柏文
金手指 - 孫柏文 舊文
來源 source: http://hk.apple.nextmedia.com
