Can Bank：國泰的兩個結局
■當年中信泰富炒輸外滙，主席榮智健連同家族成員全部都要離開。 資料圖片
業績期嚟到尾聲，今次業績期最令人有驚無喜嘅都可以話係國泰（293）輸燃油對沖輸入肉，呢幾年國泰計計埋埋淨係輸對沖合約都輸咗成180億，呢單嘢令筆者回想起當年中信泰富（現稱
中信股份）喺2008年輸外滙累計期權合約。
《蘋果》讀者都算係年輕，不妨提一提呢段歷史，2008年10月某一日，藍籌中信泰富突然公佈炒輸外滙金額達到155億元，中間細節有興趣讀者可以上網翻查資料。
反觀因管理不善……（下省數十字）國泰航空，燃油對沖輸足三年，管理層可以賴落去啲九唔搭八嘅原因（聞說連做衍生產品嘅banker都恥笑佢），仲可以一個都唔使走，可算是企業界嘅經典。相對於中信泰富當年嘅中信集團即派常振明南下救火，而當時已做咗中信泰富主席超過十年嘅榮智健連同佢家族成員全部都要離開，走嘅仲包括當時第二把交椅範鴻齡。而榮智健亦因而惹上官非。
過去一直受市場追棒嘅英資公司，喺呢個關節眼上連中資公司都不如。當年中信泰富呢一役，換曬管理層之後，9年後嘅今日投資者對佢仲有啲驚驚哋。因航輸足三年，合約仲有兩年，管理層唔似會有變動，再走落去，結果有兩個，一是等再過兩年先換管理層，然後將所有責任推向舊管理層，公司重新出發；二是一直等品牌價值越跌越低，直到一日，品牌價值低過港航，大股東Swire再自有化，又或者賣走。
散子
本欄逢周二刊出
散子
Can Bank - 散子 舊文
來源 source: http://hk.apple.nextmedia.com
