港鐵有個好主席
2017年03月28日
特首選舉塵埃落定，大熱門林鄭月娥當選。中環茶友各有不同政治取向，但講到經濟，大家都係搵銀至上。有人就話，林鄭同商界好似無乜關係，要搵特首股唔係咁易，有人就笑言，港鐵係特首換屆前諸多動作，包括拆左可加可減檢討嘅機制，咁佢係咪都有特首概念呢？
記得林鄭未選特首前，曾經講過係民生上有三座大山，即係強積金嘅對沖機制、港鐵票價同埋領展。消息漏左出嚟後，三間機構反應各異，積金局反應最低調，皆因點樣處理對沖機制，政府有好大主導角色，現屆政府同林鄭，基本上定調係政府要落水，同商界拆掂佢。至於領展就最硬淨，擺出唔多睬理嘅姿態，可能管理層諗過度過，覺得同政府傾咁多無乜着數。
票價機制成功拆彈
至於港鐵，話晒政府都有七成股權，當然好難唔理。林鄭批評港鐵時，佢嘅高層啱啱換完仲係未穩定，之後主席馬時亨同行政總裁梁國權慢慢熱身，熟悉財務嘅馬時亨開始拆彈。肥馬當時射左條橋俾現政府，話港鐵係上市公司好難直減車費，但政府可以把收到的利息嘔番出來減車費。當時政府唔接受，但林鄭競選時就一聲OK，將利息津貼票價納入佢政綱之內。
港鐵連續7年加價後，今年終於凍結票價！根據新的港鐵票價調整機制安排，港鐵今年加價幅度不足1.5%，未達1.5%啟動加價水平，加幅需延後一年實施，這意味港鐵8年來首次凍結票價。馬時亨亦仲連消帶打，叫政府不如減持港鐵，賣左啲錢用嚟做個基金，資助市民交通費。
過去政府賣港鐵，認購市民如果揸到而家真係賺到笑，如果政府減持相當會好受歡迎，跟住有資助又係幫左運輸機構減低票價壓力。有議員就質疑呢個建議係想削弱政府股權同影響力。不過，在此前之前，馬時亨叫政府考慮用港鐵股息資助票價，林鄭都同意馬今次叫政府賣股，無人敢話一定唔得。
有中環茶友話，港鐵呢幾年爆左唔少鑊，嚟緊仲有沙中線超支，同埋高鐵通車等，單單都唔係細嘢，過去兩年，好彩佢有肥馬呢個主席係度頂住，如果唔係可能同政府關係搞得好差，港鐵股價邊有而家咁靚仔。未來港鐵嘅地產項目慢慢上番，如果樓市唔跌，咁港鐵即使唔加價，收入亦可水漲船高。茶友話，馬時亨做咁多嘢收少少袍金，其他機構嘅老頂同管理層，都咪話無壓力喎。
特首選舉完畢，恒指一開高少少就一路滑，日股、歐股都跌，似乎係關注美國總統特朗普廢除奧巴馬醫改遇上滑鐵盧，令人影響左對新政嘅信心。恒指收報24193，挫164點；國企指數收報10362，跌115點，成交890億元。上周大幅波動嘅美圖公司(1357) 因為派成績表繼續見紅，股價急挫17%，收報12.88元，成交繼續唔少。
中石化穿6元可博收息
內房內銀股昨日調整都幾明顯，中資金融股幾乎全線下跌，建行(939) 跌0.94%報6.33元；工行(1398) 跌0.78%報5.12元。內房股中首創鉅大(1329) 、綠城中國(3900) 挫12%；合景泰富(1813) 跌8%報5.65元；恒大(3333) 跌6.5%報6.2元；中國海外(688) 亦跌4%報22.7元，為跌幅最大藍籌。
中石化(386) 去年業績勝預期兼增派息，仲預告今年首季盈利續向好，隨即獲多間大行唱好，睇得最好嘅瑞信給予「跑贏大市」評級，目標價睇8.3元。中石化收報6.21元，升1仙。佢靚仔業績遇上跌市，由於派息唔錯，若然好似早前跌穿6元水平，又係低吸炒上落機會。
陸羽仁
金融High Tea 舊文
來源 source: http://hdfin.stheadline.com
