財路：哈電仲有大把水位
■哈電新任董事長斯澤夫（左二）履任，厲行改革，成績單靚仔曬。 互聯網圖片
哈爾濱電氣（1133）全間公司總市值60億元唔夠，手頭現金係集團市值3.5倍，超級現金牛之餘，主打電力設備瓣數，又食正一帶一路拓展，哈電掂過碌蔗。
哈電到上年尾揸現金181億元人仔，折約213
億港元，係集團總市值59億元的3.5倍。扣埋吸收存款同同業存款31.5億港元、長短期債項59.8億港元，哈電仲揸住淨現金約122億港元，講緊亦係總市值兩倍！
哈電超級現金牛，橫風橫雨都唔怕。場內專業預估，哈電今、明兩年PB0.37倍同0.35倍，場內搞核電設備近磅行家，PB1倍起標，搞電力設備上海電力（2727）兩年預估PB0.87倍同0.84倍、金風科技（2208）1.25倍同1.1倍，哈電平到笑！哈電上年盈利翻一番到4億元人仔，集團新任董事長斯澤夫履任，新官上任真係三把火，厲行改革，加埋開發新市場，又力拓海外市場，包括簽咗迪拜同印尼項目，成績單靚仔曬。
仲要咁睇，哈電上年嚟自國際訂單169億元人仔，佔營業額近半水位，又據瑞信報告講，哈電成功簽約迪拜項目，反映集團喺高端國際火電市場實力。又據內地數據，單係今年第一季，一帶一路國策下，沿線61個國家新簽工程952份，完成營業額144億美元，折約1,123億港元。
睇到亦諗到係，中國國策環保，以潔能代煤，火電暫緩或停止興建，內地火電設備唔掂檔，但哈電已經有好大營收佔比，係嚟自海外市場，又隨住一帶一路開發，加埋哈電本身競爭力，食住海外市場條水，哈電一樣掂過碌蔗！
煲哈電，當翻半番到5.2元咁計，集團明年預估PB先得0.53倍，都仲未追到最近磅嘅上電PB，哈電實情大把水位！
錢雋
細價股專家
本欄逢周二刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
錢雋
財路 - 錢雋 舊文
來源 source: http://hk.apple.nextmedia.com
