有得賺先收割
2017年06月13日
美國科技股上周插低，雖然幅度其實唔算好大，但就引起咗投資者嘅戒心，港股昨日顯著調整，低開後腳仔軟軟，未到中午食飯已經插咗300點，下午大家預咗掛更高風球，炒股興趣都影響埋，好友無力收復失地。
恒指呢次推上兩萬六千點再度無功而退，從另一個角度講
未必係壞事，皆因炒上去嘅氣勢唔夠，只係靠個別大股撐住，咁樣夾硬推高，谷得到都未必好。外圍科網股大跌，源頭之一係高盛提醒大家，科技股都係周期性股份，有起有落，唔係上升唔跌。同一時間，高盛似乎對美股都審慎咗，有女股神嘅高盛分析員科恩，就話美股短期下跌機會高過上升。
議息前股市先降吓溫
投資界對美股前景有啲分歧，相信部份源於聯儲局即將議息，市場而家估計加息機會係百分百，但確信度就較前下降，即係話你問分析員有幾大機會加息，分析員個個都答會加息，但信心就無以前咁強。分析員估計美息上調嘅確信度下降，反映佢哋覺得今次加咗息後，美息係咪再加多咗猶豫，呢種情緒主要係最近發表嘅數據，經濟增長力度略為減弱。美聯儲局偏向鴿派嘅作風，加完息後點講，先係今個月議息嘅重點。有財金界睇法係，美國企業財政財強健，如果公司負債唔係咁高，承受利率上調嘅能力自然增加，所以唔好低估美息再上機會，因為聯儲局而家每次加息只係四分一厘，同格林斯潘時代加息每次半厘，加幾次就已經到位好唔同。
市場人士關注央行對美息前景嘅展望，所以股市係未揭盅前就跌定先，如果開會後央行出嚟放鴿，咁個市就會係消息明朗後反彈，若然央行語氣強硬，咁個市就會再插。從呢個角度講，股市係開會前先行調整，減低咗景氣感覺，其實未必係壞事。
美國科技龍頭唞唞，香港嘅科網概念股自然要跟跌，但無論係股王騰訊(700) ，抑或係手機關連股，跌幅都唔算大，騰訊曾跌近3%，收市跌約2.5%；瑞聲科技(2018) 下跌約4%，是跌幅第二的恒指成份股。其他科技股普遍受壓，鑫網易商(1039) 跌5.9%，報1.28元；IGG(799) 挫4.2%，報11.56元；慧聰網(2280) 跌3%，報5.89元；博雅(434) 跌2.7%，報3.57元。高盛話，科網股都係周期股，呢個講法即係話而家幾家大科技股好似蘋果生意已經飽和，由增長型變成周期型，視乎新服務同產品推出變動。科網股係增長股抑或周期股，其實唔止睇佢嘅科技含量，最重要係佢跨行業經營嘅潛力有幾大，好似FB主要係做廣告，有人話佢而家雖然天下無敵咁滯，但過幾年平台可能就會過時；同樣，蘋果手機功能已發展好成熟，點樣令到消費者肯再使多啲錢買佢產品，就變成係挑戰。如果如呢個標準去秤，騰訊越界經營能力仲係唔錯，周期味道無咁濃，至於手機設備股，好明顯係跟手機應用掛咗鈎，如果消費者唔肯大幅增長買手機嘅支出，咁佢哋嘅增長就變成生產商間你爭我奪嘅生意，自然好難維持增長股嘅高市盈率估計，外圍科技大股無運行，咁佢哋嘅衝擊就最直接。
吉利先低後高
大市昨日調整得比較明顯，恒生指數低開104點，其後跌勢加劇，最多曾跌341點，收市報25708點，跌322點，國企指數報10485，跌106點，成交876億元。個別熱炒大股都出現單日轉向，汽車股熱炒獲調高評級嘅長城汽車(2333) ，瑞信將佢目標價升至12.5元，評級亦升至跑贏大市，長城收市報11元，勁升21%。近日升咗好多嘅吉利(175) 早段一度跟升近2%，最終倒跌逾4%收市，最跌幅最大的藍籌股，反映好多低位買咗嘅股民寧願先收割鎖定利潤。另外，中國恒大(3333) 上周五公佈將持有的萬科A股，出售予深圳地鐵，因而錄得逾70億元人民幣虧損，恒大股價早段升逾3%，其後倒跌最多逾3%，收市跌逾2%；萬科企業則升逾1%收市。
陸羽仁
金融High Tea 舊文
來源 source: http://hdfin.stheadline.com
