中環在線：證監會阿頭凍薪
■證監會CEO歐達禮（左）及主席唐家成（右）舊年雙雙凍薪。 資料圖片
香港住宅地貴，商業地亦不遑多讓，早前連環爆出中環美利道與啟德兩幅商業地王，麵粉價貴，麵包價都唔會平，呢個時候，證監會最新一份2016/17年年報就披露，佢哋正式預留30億元作為購置物業儲
備，其實證監會講話買寫字樓好多年，講到𠵱家越來越貴都未買!
今年初證監會向立法會匯報時，已經提過呢30億元買樓儲備金，事關證監會現正租用中環長江中心，如果自置物業，每年慳租慳2億咁多。當時已經俾立法會議員鬧一餐，證監會主席唐家成要急解畫，指買寫字樓係長遠策略，會慢慢睇、慢慢揀，唔會急住入市雲雲。
年度轉蝕3.5億
可能為免惹來更多火頭，加上證監會呢個年度轉蝕3.5億元，證監主席唐家成與行政總裁歐達禮舊年雙雙凍薪。唐家成袋101萬元，算係意思意思，歐達禮年薪依舊973萬元。其他董事好似何賢通、雷祺光兩名執董有輕微加薪1.8%，梁鳳儀就稍減0.7%。
有口痕友就話，可能兩個阿頭要做樣，為赤字勒緊褲頭負責，仲有啲陰謀論話，林鄭上場在即，佢競選時已經對證監會阻住阿里巴巴來港上市唔多滿意，兩位自動凍薪都唔出奇。
李華華
mailto:LiWaWa@AppleDaily.com
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
李華華
LiWaWa@AppleDaily.com
中環在線 - 李華華 舊文
來源 source: http://hk.apple.nextmedia.com
