揀酒店股唔使豪
2017年06月15日
港股輪流炒，呢兩日炒到酒店股，呢個都係資金搵平嘢炒嘅表現，大酒店(045) 收報10.98元，升咗6%；信和酒店(1221) 升咗6.6%，報收2.9元，創出今年高位。酒店股好多都係資產重秤，係物業有價下，大件夾抵食，所以就炒吓。不過，呢類
型股票其實幾沉悶，所以炒佢都要識得揀，升得多也要識得走。
酒店股獲資金追捧，相信係同銅鑼灣怡東酒店放盤有關。自從業主話放盤以來，賣產行動開始啟動，首先就係搵代理做嘢，最後係咪賣得成仲有好多關要過，若然真係成事，唔好講話賣300億元，就算200億都已經係一個紀錄。除左怡東酒店，市場盛傳另一單「刁」係玩具大王蔡志明嘅九龍城廣場，佢承認已經收左5%訂金，準備將個場賣俾內資，作價50億元，若然成事，佢就執成35億元。
資產高唔等如會賣
商用物業有價，於是資金就追捧磚頭股。有磚頭嘅公司，最落後係酒店股，皆因酒店業受自由行減少打擊，生意呢兩年倒退，所以酒店股普遍都同資產有好大折讓，好以呢兩日急升嘅大酒店(045) ，昨日升5.8%，升到10.98元，其實每股資產淨值有23.2元，就算股價急升左都仲有53%折讓，以佢172億元市值，單計旗下尖沙咀嘅半島酒店都唔止啦。同樣，隔佢無幾遠嘅美麗華酒店(071) ，昨日升左4.2%，收報18.7元，每股淨值26.2元，成間公司值115.2億元，如果怡東都值200億元以上，美麗華係咪嚴重低估呢？
如果計磚頭，酒店股真係好抵買，但呢個狀況唔係今日先存在，點解呢排炒佢呢？主要係因為資金唔敢高追貴股，加上有新成交刺激左市場注意力，要留意係做酒店回籠好慢，好好長線嘅投資，資產折讓大只係紙上富貴，最重要係有無機會變現或者派息，如果無，可能炒完一輪就收工。所以買酒店股，最好係買旗下物業有重建價值，包括物業地契可以改做商廈甚至已經批則嘅。如果酒店係好靚好豪、好有歷史價值，業主好大機會唔捨得拆同賣嘅，咁反而吸引力無咁大添，例如大酒店就係呢類，佢可以拆半島酒店咩？ 所以無乜豪華酒店嘅遠東酒店就升咗14%，但炒資產可以買入炒吓，炒夠要走。
安邦陰霾壓中字股
資金係美國議息前打穩陣波，港股一度下跌過百點，尾市回升，恒生指數收報25875，升23點。國企指數收報10514，跌10點；成交金額764億元。騰訊(700) 逆市走高，為表現最佳藍籌股，U盤升至全日高位收市，報277.4元，升5元。安邦保險再起風波，董事長吳小暉不能履行職務，有報道指，他上周五已被當局帶走。加上有外資券商指近日「國家隊」資金一直減倉，中資保險A股及H股今日跑輸，中國平安(2318) 跌1%，報51.25元。
新股呢排鑊氣唔錯，創業板而家要公開認購，音樂演唱會視像顯示解決方案供應商 ITP Holdings(8446) 首掛，開報0.52元，最高去過0.88元，收報0.59元，較發售價0.3元高出97%，不計手續費每手賺2900元。前日掛牌嘅藥明生物(2269) 最高升過29.6元，收市報28.5元，升左0.9%。
陸羽仁
金融High Tea 舊文
來源 source: http://hdfin.stheadline.com
