操盤手劄記：資金翻兜吼破頂股
■股神一向主張買指數基金，事實證明，過去十年ETF遠遠跑贏對沖基金。 資料圖片
本周主要有兩個戲碼──議息同結算。先講議息，戲肉係周四淩晨2時美國聯儲局公佈議息結果，同日仲有英倫銀行、瑞士央行登場，周五就到日本央行。對於聯儲局，相比加息，市場更關注縮
表，怕拿捏失準會引發金融危機。至於結算，周五既係A股期指結算之日，亦係美股四期結算嘅四巫日，好淡激戰，在所難免。
好戲上演前夕，美股道指、標指再創新高，納指亦喺科技股帶動下反彈，可惜港股受安邦出事拖低A股影響，只微升0.09%，收25875。恒指喺4月19日低見23723後急升，6月9日高見26090，不足兩個月累升2,367點，借消息調整唔奇，按黃金比率計算調整幅度，若回調0.382倍將下試25185。不過，喺憧憬MSCI下周公佈A股入摩，以及七一有望收到回歸廿周年大禮之下，港股有望回氣再上。
美國科技股調整兩日後反彈，本港科技股龍頭騰訊（700）上周五破頂高見283.4元後，整固兩日又見資金翻兜，並以全日高位277.4元收市，升1.84%。以往騰訊每次調整至20天線附近就反彈，今次都係，若再見調整，不妨參考此位開倉。
近日破頂後回調嘅股份，仲有3隻A股ETF──南方A50（2822）、安碩A50（2823）、華夏滬深300（3188），睇好A股入摩嘅話，亦可吼位吸納。股神畢菲特一向主張投資者買入指數基金，佢喺2005年提出一個十年賭約，睇標普500指數定對沖基金回報高，2007年有基金經理接受賭約，今年底屆滿；不過，股神可以提前慶祝喇，皆因對沖基金回報已遠遠落後於指數。事實上，基金經理高昂嘅管理費，就係蠶食回報嘅主因。
講開股神，原來佢同深水埗明哥係同道中人！話說一年一度嘅畢菲特慈善午餐拍賣，早幾日剛以近268萬美元成交，一如既往，全數捐畀慈善機構Glide Foundation，為窮人同露宿者提供食物。咁咪同明哥派飯畀窮人同露宿者一樣囉！
割柑人
本欄逢周四刊出
97年主權移交至今，香港前進還是倒退？「蘋果」與你細數廿載風雨。
【回歸二十年】專頁：http://hksar20.appledaily.com.hk
割柑人
操盤手札記 - 割柑人 舊文
來源 source: http://hk.apple.nextmedia.com
