收市閒情：學習點做Social精
■行走江潮，最忌唔識Social。 資料圖片
行走江潮，最忌唔識Social，連如何Hi點樣Bye都唔識？唔使騰，記住呢個字得啦：「騷」。
「騷」，做Show也！出得嚟行，當然Say Hi都要Say得浮誇！大家練習一嚇：（吸氣！大聲！）「Wei~（
拖長、漸細），好耐冇見呀，你呢期點呀……」成句句子重點係個「Wei」，只要重音、長度拿捏得精準，自然順利向各路人馬下馬威！
進階嘅「Social精」，更加會配合肢體動作，加深對方印象：兩手食指一前一後擺，指住對方，面帶微笑，至於眼神就更加係精髓：瞇起少少，想像嚇挑逗得來帶點挑釁，咁就中曬！後面兩句音調都唔好忽視！「好~耐冇見呀」，重音喺個「好」字，呢句要畀少少感情，交啲啲戲，要有一種彷如隔世嘅感覺。只要前兩句交到戲，去到第三句就可輕描淡寫啲，順利將話題伸延。
正所謂「行船爭解纜，Say Hi要講先」，行走Social場合，見到一個識你嘅人，最緊要先發制人！特別係咩情況？就係你完全、根本、100%對你面前呢條友零印象！主導對話內容，你就更易猜度對方，到底係咩頭咩路住喺邊一度。
嗱！做戲做全套，做騷都係有道具好，一張勁嘅卡片就少不了。如果本身份工Title唔夠照，唔怕！自己卡片自己作，你諗到咩Title就寫曬落去，咩「港九新界潮汕福建X氏宗親會創會會員」「Mensa十年資深會員」「圍威喂協會總幹事」「XXXX University BSc(Hons) in Waterblowing」……當你寫到張卡片要對摺，咁就Perfect池！
識做「騷」，你行走Social場合，真係事半功倍，無往不利（可能係）。不過，呃得一時，呃唔到一世。只係識得吹水做騷畀Jetso又點？最後一個人有冇朋友，睇真誠；成唔成功，睇實力。試問，你幾時見過李嘉誠行出嚟「Wei~（拖長、漸細）」；難道朱克伯格行出嚟，你問佢「Where"s your card?」所以，四圍派張「對摺卡片」嘅人，都係環保啲、慳啲啦！
千頌C
http://www.fb.com/winbigwok
本欄逢周三刊出
千頌C
收市閒情 - 千頌C 舊文
來源 source: http://hk.apple.nextmedia.com
