炒電動車股要信阿爺
2017年09月27日
港股經過周一大插，噚日未有明顯反彈，收市指數微升。指數喺兩萬八千點插落嚟，跌勢都幾急，令投資者都窒咗一窒，表現反覆都算係正常。
指數窄幅上落，早排大炒嘅幾個板塊，內房同手機設備股都仲係弱勢，新能源汽車股嘅比亞迪(1211) 就強勁反彈
，大戶睇嚟仲係睇好內地力推新能源車嘅概念。國家工業和信息化部副部長辛國斌早前出席論壇時話，中國已經為停止生產同銷售傳統燃油汽車制訂時間表。雖然政府希望將現有嘅新能源汽車市場佔比喺2025年前，提升到20%。對於內地呢個目標，惠譽就潑冷水，話內地要喺20年內全面禁止燃油車，唔太可能實現得到。
惠譽潑冷水出報告質疑
惠譽睇淡政策刺激嘅理由係，新能源汽車喺內地受歡迎，主要係政府對新能源汽車嘅補貼同大城市車主唔受限牌政策優待，但買車補貼將會喺2020年後結束，加上電池技術同充電基礎設施始終未完善，購買電動車嘅吸引力自然下降，預期市場增長將會出現放緩。同時中國汽車市場規模龐大，地域分佈廣泛，但新能源汽車銷量大部份集中喺一二線城市，而且以低端車型為主，反映發展方向極唔平均，難以喺全國實現，而要喺20年內全面禁止燃油車，只係中國政府針對其他國家激進時間表所作出嘅回應。
比亞迪同其他汽車板塊近日大炒，主要係呢個概念，大家博未來會有換車潮。惠譽認為呢個目標唔現實，覺得內地咁講係應對外國嘅政策。坦白講，咁激進嘅換車時間表，陸羽仁都有懷疑。不過懷疑嘅唔係內地，而係對最先提出呢啲咁進取指標嘅歐洲國家，皆因新能源汽車取代傳統汽車，科技固然難搞，就算科技可以搞掂，咁嘅變革涉及唔少利益轉移，以歐洲呢啲民主國家，現有利益集團一定大力發功進行游說，係咪可以咁快呢？
新股暗盤仍然向好
反觀好似內地呢啲國家，如果有清楚目標同意志，佢哋落實嘅執行力仲強。如果大力推動電能車係未來世界潮流，內地認定咗目標，以佢哋喺新科技產業要爭先嘅決心，惠譽所講嘅困難只係次要嘅挑戰啫。
從市場反應睇，似乎投資者都睇好內地電能車發展，比亞迪(1211) 大力回落兩日後，單日急彈咗11.63%，收報73.9元；另一隻汽車股吉利汽車(175) 升0.68%。至於其他板塊基本都係唞氣，大市拉鋸一輪後，叫做保住唔再跌，恒指收報27513，漲12點；國企指數收報10968，上揚55點，成交金額970.85億元。另一個好啲表現嘅板塊係石油股，「三桶油」造好，中石油(857) 收升3.5%報5元；中海油(883) 升4%收造9.9元；中石化(386) 漲1.7%造5.91元。其他油服股亦都造好，宏華集團(196) 升近6%報收0.71元；山東墨龍(568) 升11.3%收1.38元。
創業板改革後，公眾可以有得認購，內地殯葬服務公司中國萬桐園(8199) 喺創板上市，公佈招股結果，合共收到9798份有效申請，錄得101.95倍超額認購，經過重新分配後，分配至公開發售嘅發售股份最終數目，增至全球發售股份總數嘅50%。萬桐園今日上市前喺暗盤市場大幅高收，收報0.455元，升62.5%。
不過，真正矚目嘅係聽日掛牌嘅眾安保險(6060) ，市傳佢會升10%以上，由於佢市值咁大，有咁升幅股民都收到唔少利是啦。
陸羽仁
金融High Tea 舊文
來源 source: http://hdfin.stheadline.com
