智取大市：政治市焗縮注碼
■港股噚日大跌，唔少散戶喺收市競價時段買騰訊、平保。 資料圖片
稅改引發美股換馬，美國科技股大跌拖累港股？其實只係藉口，更重要係內地公募基金不能淨賣出A股，令A股有風吹草動，就選擇喺港股掟貨。即市A股彈、港股就有得彈；即市A股唔升或跌，港股就要跌。如果A股出
現人為慢跌嘅話，港股就跌得更甘。而家大家面對嘅對手係A股大戶，終極big boss當然係中央。
上述因素下，打破咗年尾前港股進入安全期嘅美夢，市場風險胃納下降之下，被逼減倉至舒服水平。要等A股陰霾過去，或港股夠超賣、估值吸引，先係進取好時機。
港股由突破3萬點回落一個星期多啲，以大陸政策轉向嘅往績計，通常一浸搞你三幾個星期，典型例子係2015年港股大時代，由6月初跌到7月8日，牌面睇今次情況相對輕微，原因係A股今浪升勢成交遠低於2015年時，沽壓自然細啲。不過，恒指形成突破性下跌裂口，要幾個交易日保持不跌，先確認解除風險。風眼位置會係升幅多、成交量大嘅股，變數大咗，自然用倉位調節風險。
騰訊（700）競價時段398蚊樓上近6,000個買盤，成咗近5,000個。平保（2318）競價同樣有過千買盤於77蚊食曬貨。散戶積極參與接飛刀，今次會贏定會做燈呢。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
