笑到最後：今年樓價兩個睇法
■預計今年普遍二手上車盤會炒至接近600萬元。 資料圖片
2016年11月06日，本欄力排眾議指「辣招令樓價再升一成」，當時中原城市指數143.68點，至2017年底，已升至165.02點，升幅接近15%，遠超預期。每次加辣，客觀結果就係令二手供應減少，挾升
只係時間問題。辣招推出超過七年，每次加辣後樓價例升，假設你想賣樓，你會唔會平賣呢？
稅制傾斜樓市係一個重要因素，舊年令大部份睇淡嘅專家跌眼鏡嘅主因係，港股出現慢牛，牛市等同所有資產冇緊急套現嘅需要，只要買盤繼續出現，樓價就挾得起。
至於今年樓價點睇，高明至少有兩個睇法：一、騰訊（700）見439.6蚊後暴跌係一個轉捩點，下跌後由400蚊開始每十蚊出現一次血肉長城，從買盤數量推斷已經有大量散戶上車買騰訊，估計持貨至今。
如果騰訊繼續升，隨時去到高位股轉樓，而最低限度都唔會沽樓，肯定會推高樓價。但係萬一今年港股出現牛三，高位變熊，呢批創新高後暴跌先肯買嘅投資者，肯定會越跌越買騰訊，到熊市持續，可能出現流動性危機要賣樓套現。所以今年樓市取決於港股，只要唔出現股災，樓市唔會出現跌浪。
二、高明亦都寫過，樓市見頂理論價，就係二手市場400萬元以下樓盤消失，最牛理論價就係炒至600萬元以上。2017年400萬元上車已經等同到價，高明預測，今年普遍二手上車盤會炒至接近600萬元，因為港股大牛市會影響置業人士情緒，見股市瘋狂就會覺得買資產有逼切性，令樓價挾得更快。
另外，亦都不得不留意，林鄭月娥政府會唔會減辣，減辣表面上好似吸引炒家入場，實際上炒家唔會咁笨升咗十年先入場接貨，反而大把二手樓持貨者等緊食糊，一旦減辣供應一定大增，港股大牛市仲可以頂多陣，如果「股災＋減辣」同步出現，到時係點？梗係到時先算啦，依家順勢繼續坐順風車好過。
高明
http://fb.com/bigricetea
本欄逢周一刊出
高明
笑到最後 - 高明 舊文
來源 source: http://hk.finance.appledaily.com
