智取大市：消費升級唔簡單
■青啤加價，股價大升，睇嚟仲未完全反映基本因素轉勢。 資料圖片/互聯網圖片
原本想講李寧（2331）下集，但青啤（168）同華潤啤酒（291）話產品加價，值得打尖講一講。
《新京報》講到，華潤啤酒旗下9款啤酒加價2至10蚊人民幣不等，同時青啤亦加價，傳聞加幅起
碼一成，青啤星期五半日曾經爆升23%，當日上午收升超過一成，但係中午青啤嗱嗱聲澄清話報道失實，只話「部分區域部分產品」擬加價平均半成，午後借消息震嚇倉就回穩，全日照升超過一成。睇嚟青啤加價半成，件事一樣唔簡單。
之前以為茅台個品牌鶴立雞群，先有條件加價18%咁狼死，殊不知啤酒都有咁嘅加價本事，就feel到呢場經濟、消費升級潮有幾厲害。
先講青啤，假設主要產品兼區域都加價半成，同時生產成本亦平均上升半成，以舊年上半年條數計，粗略估計令稅前盈利提升18%，仲未計加價背後原因係需求回升，銷量一樣重返上升周期，況且青啤加價冇雪花咁狼，中長線價格周期見底回升，之後就有條件追返加幅。一件事反映產品價升、量升、毛利升、周期回升。股價單日升一成，過去一年升六成，近年低位升未夠一倍，已足夠反映基本因素轉勢？小弟就覺得遠遠未夠，候低吸，冇壞。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
