經濟客艙：
美股認真討論區
■美股狂牛，但原來美國散戶持股比例，相對2008年金融海嘯期間更低。 資料圖片
美股今年開局強勢，未必全民皆股，美國散戶持股比例，相對2008年金融海嘯期間更低。
最近睇到《華爾街日報》有個故仔，提到美國股市表現嘅時候，但散戶參與程度下降
。報道引述咗蓋洛普調查，科網泡沫爆破後起，2001年至2008年期間，平均超過六成美國人有炒股。相對，2009年至2017年期間，聲稱有買股票嘅美國人，比例降至54%。
最近搵咗美國不同年紀嘅散戶同金融業界人士做訪問，講嚇對美股同投資嘅睇法。相比其他千禧BB或八、九十後嘅散戶，分享點解唔願買股票、寧願揸現金，有位基金經理John Fox講嘅感受，最淡淡然，但印象最深刻。佢形容今輪美股狂升，係佢職業生涯最唔期待嘅牛市，絲毫感受唔到興奮，又唔似千禧年咁，連酒吧嘅電視都播CNBC嘅節目。
John Fox喺金融圈打滾超過30年，由87年股災到科網泡沫爆破，再經歷亞洲金融風暴，到2008年金融海嘯，原來睇慣金融大場面嘅專業投資者，投資炒賣都想講求「氣氛」兩隻字，「贏大家一齊贏，輸就大家一齊輸」。氣氛越熾熱，投入程度越高。
報道無提到John Fox點解對今次美股升市咁冷淡，亦冇披露佢持倉去年係咪輸好多，但可以肯定美股升市，散戶唔玩，最緊要有大戶落場，服侍美國1%富人嘅投資，仲多錢賺。
FB: https://www.facebook.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com
