智取大市：中美雙重去槓桿
■道指跌得越深，槓桿投資就更加有不問價鬥快平倉嘅危機，連鎖效應出現就更難止跌。資料圖片
道指日波幅千點，成為上周指定動作，連日波幅不下於2008年金融海嘯同2011年歐債危機，但暫時由高至低跌幅只係一成多，即係調整跌幅、股災波幅。
道指周三受制50天線，周五
晚道指收復100天線，底部出現陽燭較短、下影線較長嘅「身懷六甲」，都好難斷言美股同港股見底，因為如斯大波幅本來就係大警號，反映市場極神經質，乜都可以發生。
周二道指急彈，可以話係周一隊到冇棚之後嘅超賣反彈。周五嘅絕地低位千點反彈，就反映兩件事，第一，維持大跌一日、小彈一日嘅規律；第二，投資者期待周六日能夠buy time解決恐慌性拋售。
道指跌得越深，槓桿投資就更加有不問價鬥快平倉嘅危機，例如之前所講嘅槓桿被動投資，連鎖效應出現就更難止跌。與此同時A股情況極相似，上證50三日跌一成，唔排除之前做落中間級結構化股票配資3:1:8或3:2:10（槓桿開大3倍同4倍）有不問價平倉風險，規模難估計。如果中證監再出禁售令就逼沽壓集中港股，衰多幾錢重。
港股要即時見底，首先美股同A股平倉潮同時閘得住。潛在危機打孖上，爆進一步恐慌性拋售機會率亦打孖上，呢個亦解釋到近期恒指跌得咁急嘅原因。
晉佳
http://fb.com/advanceguy1
本欄逢周一、三、五刊出
晉佳
智取大市 - 晉佳 舊文
來源 source: http://hk.finance.appledaily.com
