經濟客艙：
弊傢夥！交易員講大咗
■Alessio Rastani喺7年前接受訪問，講咗真心果句，一語道破現實交易生存法則。 互聯網圖片
有位交易員講咗真心果句，一語道破現實交易生存法則，交易員存在目的就只有一個，於交易中賺錢，然後就是在交易中賺更多嘅錢。
交易員
名字叫Alessio Rastani，2011年9月接受英國廣播公司電視訪問，當時市況由於發生歐債危機，市況唔多明朗，作為英國倫敦一個交易員，又受到邀請咪講嚇分析。原本一個不起眼嘅3分鐘財經訪問，成為七年後都仲有人講嘅訪問。
咁位交易員講咗乜嘢？咪就係講真果句，連唔應該講嘅都講咗出嚟，「問我點樣拯救金融體系，解決經濟問題？其實我連發夢都想見到家陣冧市咁樣。」交易員角度咁睇，有危先有機，經濟有難，先有搵錢機會。當年佢嘅真評論被瘋傳，甚至吸引傳媒起底，係咪「扮曬交易員」等。
確實這位名字叫Alessio Rastani係真正嘅交易員，過去7年以來到底有冇好似佢似咁賺錢唔太清楚，但一直留守財金界，繼續做外滙同股市評論員。準唔準就見仁見智，近來都好少見佢喺外國主流媒體出現。近日市況持續低迷，牛轉熊有好多迷思，未必嚇嚇遇到講心果句嘅交易員、醒你買賣貼士，不如自己做嚇功課打打底好啲。
面對今次調整市，美股而言其實並非罕見。標普500指數過去有404日跌幅少於半成，過去兩年以來只有升幅、欠波幅。如果再拉遠少少睇，標普500指數過去68年時間，出現36次多於一成調整。攤開嚟計，每隔兩年左右就出現一次顯著調整。另外，標普500指數牛市時間比熊市長，過去35次調整共6587個交易日，平均每次調整少過半年。相反，標普500指數持續超過1.8萬日，即係50年咁長，有股念力話我知，美股8年幾牛市有無咁易斷纜。
FB：http://fb.com/seeforcaptain/
Captain Cool
經濟客艙 - Captain Cool 舊文
來源 source: http://hk.finance.appledaily.com
