【魚樂無窮】過山車市況自衛術（唐牛）
恒指由33000點急墜至接近30000點，歷時不足兩星期，如果要用三個字形容，跳樓機會係不二之選。喜愛機動遊戲的戰友都知道，玩得跳樓機，又點會唔試埋過山車呢？事實上，港股急跌後波動性明顯增加，升完又跌跌完又升情況，一日可以出現好多次，鍾意短炒嘅高呼
過癮。點解？因為波幅才是他們最好的朋友。
現時判斷升市玩完與否，實屬言之過早，但對於慣咗慢牛坐貨等收成嘅戰友來說，轉一轉作戰策略卻是必須的。無他，短線走勢由拾級而上變成chok上chok落，要增加坐貨籌碼，必須採用攻守兼備策略。
先講防守，第一步要現金倉坐貨，不可再孖展度日，否則隨時被大浪淹沒；第二步是減磅至一個舒服水平，準則因人而異，我喜愛套用曾淵滄的說法︰最緊要夜晚瞓得安落。
再講進攻，繼續分兩注出擊，一注長倉，一注短炒，由於波幅增加，回報及風險隨之上升，是福是禍要看你的技術及造化；另一個更重要的是，短炒要即日平倉，不宜坐過夜，事關美股表現鑊鑊新奇鑊鑊甘，港股很容易gap up gap down，唔好彩企錯邊，隨時一命嗚呼！
唐牛fb專頁
http://www.fb.com/tongcow88
魚樂無窮 - 唐牛 舊文
來源 source: http://hk.finance.yahoo.com
